Prafiesar Dejvid Nat, niejrafizijafarmakołah z Brytanii, zajaviŭ, što raspracoŭvaje rečyva, jakoje pa svaim efiekcie budzie dublavać ałkahol, ale bieź niehatyŭnych efiektaŭ.
«Ałkahol zabivaje 2,5 miljona žyćciaŭ štohod, bolš za malaryju i ŚNID. Pryčyna hetamu viadomaja: ałkahol maje taksičnaje ŭździejańnie na ŭsie sistemy orhanaŭ», — piša navukoviec. Nat kaža, što vyjściem moža być ci pavyšeńnie cenaŭ, na što nie aśmielvajucca ŭłady, ci stvareńnie nietaksičnaha anałaha.
Nat paviedamlaje, što ŭžo sintezavaŭ piać chimičnych rečyvaŭ, jakija naŭprost uździejničajuć na niejratranśmiternuju sistemu hama-aminaalejnaj kisłaty i pavialičvaje jaje vykid. A mienavita hama-aminalejnaja kisłata inhibiruje niejraimpulsy i «supakojvaje» mozh — toje samaje adbyvajecca, kali čałaviek pje ałkaholnyja napoi.
Adroźnieńnie Natavaha «narkotyka» ad harełki ci piva ŭ tym, što rečyva budzie ŭździejničać naŭprost na mozh, tamu atrutnyja mietabality ałkaholu nie buduć škodzić unutranym orhanam čałavieka, a paśla «štučnaj pjanki» nie zastaniecca i namioku na pachmielle. Pry hetym jašče adnoj važnaj admietnaściu źjaŭlajecca mahčymaść stvareńnia antydotu, jaki moža chutka pierarvać dziejańnie zamianialnika ałkaholu.
Dejvid Nat napisaŭ, što ŭžo vyprabavaŭ svajo vynachodnictva na sabie, paśla čaho adčuŭ rassłablenaść i sanlivaść ciaham hadziny, ale pryniaŭ antydot i nieŭzabavie davaŭ lekcyju studentam. Nat taksama paviedamiŭ, što chacieŭ by pačać vyprabavańni biezałkaholnaha ałkaholu na ludziach, kab paraŭnać efiekt z uździejańniem tradycyjnych napojaŭ. Ale hałoŭnaj ciažkaściu Nat ličyć vyvad padobnaha praduktu na rynak biez kanfliktu z ałkaholnaj industryjaj.
