Kala mienskaha handlovaha centru «Parkinh» sabralisia drobnyja handlary, jakija siońnia pravodziać strajk pratestu. Lider pradprymalnikaŭ Alaksandar Makajeŭ byŭ zatrymany ale jaho adpuścili z Savieckaha RUUS, kali da budynku padyšli pratestoŭcy.

Siońnia ŭ Biełarusi adznačajecca Dzień pradprymalnika. Častka drobnych pradprymalnikaŭ adznačyła śviata strajkam. U Miensku, Baranavičach, Salihorsku, Viciebsku, Babrujsku, Vuździe, Barysavie prypynili pracu drobnyja handlary. Arhanizatary vystupu deklarujuć, što ich było navat 30 tysiač.

U Miensku nie pracavali ždanovickija budaŭničy i radyjorynak, niama handlu ŭ «Parkinhu» na Kujbyšava, u handlovych centrach «Kupałaŭski», «Eŭropa», «Zierkało». Častkova nie pracavali «Bigzz» i «Ekspabieł».

Staršynia kaardynacyjnaj rady pradprymalnikaŭ mienskich rynkaŭ Alaksandar Taŭstyka raspavioŭ, što siońniašniaja akcyja była papieradžalnaj, z metaj pryciahnuć uvahu da stanovišča drobnych handlaroŭ.

Na dumku sp. Taŭstyki, ułady nie pačuli pradprymalnikaŭ. Delehacyja pradprymalnikaŭ pieradała staršyni stałaj kamisii pałaty pradstaŭnikoŭ pa pramysłovaści, paliŭna-enerhietyčnym kompleksie, transparcie, suviazi i pradprymalnictvie Anatolu Paŭłoviču kala 1000 podpisaŭ za admienu ŭkazu № 760. Usiaho takich podpisaŭ sabrana bolš za 20 tysiačaŭ. «My chočam źviarnuć uvahu na stan pradprymalnictva ŭvohule, na toje, što nas chočuć prymusić pracavać pavodle ŭkazu jaki piarečyć Kanstytucyi — my pazbaŭlajemsia prava volna pracavać, a našaja majomaść pad pahrozaj kanfiskacyi». Sp. Taŭstyka zaklikaŭ pradprymalnikaŭ dziejničać supolna i arhanizavana:

«Siońnia naša śviata, śviata sa ślazami na vačach, ale my pieramožam, kali budziem razam».

Tym časam handlary z «Dynama», Kamaroŭskaha rynku j «Impulsu» praciahvali pracavać. Pavodle aktyvistaŭ «Perspektyvy», što tam pracujuć, ich nie papiaredzili pra akcyju. Staršynia kaardynacyjnaj rady staličnych pradprymalnikaŭ Alaksandar Makajeŭ, jaki siońnia adkazvaŭ na pytańni žurnalistaŭ kala «Parkinhu», patłumačyŭ heta tym, što siarod pradprymalnikaŭ niama adzinstva:

«Pavodle našych źviestak, lider «Perspektyvy» Anatol Šumčanka nazvaŭ našuju akcyju pravakacyjaj, tamu, ja dumaju, i pracuje siońnia «Dynama» dy inšyja rynki».

Na dumku sp. Makajeva, Šumčanka takim čynam hulaje na karyść uładaŭ.

Spadary Makajeŭ i Taŭstyka zaklikali kalehaŭ pryjści 14 kastryčnika na «Eŭrapiejski marš». Pavodle ich ža źviestak lider «Perspektyvy» A. Šumčanka planuje zładzić čarhovy mitynh na Banhałory 5 listapada.

Kali adzin ź lideraŭ pradprymalnikaŭ Alaksandar Makajeŭ kala «Parkinhu» byŭ zatrymany, udzielniki strajku hramadoju padyšli da budynku pastarunku, i Makajeva adpuścili. Tady pradprymalniki viarnulisia nazad da «Parkinhu».

Da «Parkinhu» naviedaŭsia načalnik upraŭleńnia pradprymalnictva Mienharvykankamu Alaksandar Kalinoŭski, jaki vysłuchaŭ pytańni strajkoŭcaŭ. Na sieradu na 11-ju hadzinu pryznačana sustreča z udziełam pradstaŭnikoŭ Ministerstva padatkaŭ, Administracyi prezydenta dy inšych zacikaŭlenych dziaržstrukturaŭ.

Kala 15-j hadziny pradprymalniki razyšlisia.

Lidery pradprymalnikaŭ ahučyli niekalki prapanovaŭ. Kali ŭłady nia pojduć na sastupki, z 1 studzienia pradprymalniki pahražajuć pajści ŭ adpačynak na miesiac, kab nia spłočvać studzieńskija padatki.






Fota Julii Daraškievič

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?