Razhlad zakonaprajekta ab pryvatyzacyi, normy jakoha vyklikali vialiki hramadski rezanans, pieraniesieny na viasnovuju siesiju pałaty pradstaŭnikoŭ, paviedamili infarmavanyja krynicy. Miarkujecca, što da hetaha času ŭ prajekt zakona buduć uniesieny źmieny.
Zakonaprajekt ab pryvatyzacyi byŭ pryniaty nižniaj pałataj u pieršym čytańni ŭ červieni hetaha hoda. Čakałasia, što vosieńniu jon budzie razhladacca ŭ druhim čytańni. Adnak normy padrychtavanaha zakonaprajekta vyklikali krytyku, u tym liku z boku aficyjnych asob.
U pryvatnaści ministr ekanomiki Mikałaj Snapkoŭ 22 listapada paviedamiŭ u parłamiencie, što ministerstva vystupaje za vyklučeńnie niekatorych pałažeńniaŭ zakonaprajekta. «U nas jość prapanovy (pa zakonaprajekcie), i my z zadavalnieńniem ich adpracujem z deputatami. A samaje hałoŭnaja prapanova — vyklučyć adtul toje, što tam jość», — padkreśliŭ Snapkoŭ. «Niekatoryja aśpiekty zakonaprajekta», dadaŭ ministr, nie ŭpisvajucca ŭ płany ŭrada pa pryvatyzacyi i pryciahnieńni pramych zamiežnych inviestycyj.
Jak paviedamlałasia raniej, zakonaprajekt praduhledžvaje mahčymaść pryznačeńnia pradstaŭnikoŭ dziaržavy navat ŭ tyja akcyjaniernyja tavarystvy, stvoranyja ŭ pracesie pryvatyzacyi, u jakich u dziaržavy niama doli.
«U akcyjaniernyja tavarystvy, stvoranyja ŭ pracesie pieraŭtvareńnia, akcyi jakich nie naležać Respublicy Biełaruś i (abo) administracyjna-terytaryjalnym adzinkam, abłasnymi, Minskim haradskim vykanaŭčymi kamitetami mohuć pryznačacca dziaržaŭnyja pradstaŭniki», — havorycca ŭ abhruntavańni da zakonaprajekta.
Dziaržpradstaŭniki, zhodna z prajektam dakumienta, mohuć prypyniać vykanańnie rašeńniaŭ ahulnaha schodu akcyjanieraŭ u vypadku, «kali realizacyja hetych rašeńniaŭ supiarečyć hramadskaj karyści i biaśpiecy, nanosić uron navakolnamu asiarodździu, parušaje pravy i intaresy, jakija achoŭvajucca zakonam, inšych asob».
Dziełavaja supolnaść vykazvała aściarohi nakont taho, što pieraličanyja faktary mohuć traktavacca zanadta šyroka i prymianiacca pavodle subjektyŭnaha mierkavańnia čynoŭnikaŭ.
Pradstaŭniki biźniesu i mižnarodnych finansavych arhanizacyj nieadnarazova źviartalisia va ŭrad u suviazi z padrychtoŭkaj hetaha zakonaprajekta. Tak, členy Kansultacyjnaha savieta pa zamiežnych inviestycyjach pry Saviecie ministraŭ źviartalisia da premjer-ministra, vykazvajučy zaniepakojenaść padrychtavanym zakonaprajektam.
«Mahčymaść nakładańnia čynoŭnikami zabarony na šerah rašeńniaŭ akcyjaniernych tavarystvaŭ pa sutnaści aznačaje viartańnie da situacyi, anałahičnaj isnavańniu admienienaha jašče ŭ 2008 hodzie instytuta «załatoj akcyi», — adznačali ŭ svaim liście členy kansultacyjnaha savieta.
Mižnarodnaja finansavaja karparacyja (IFC), padraździaleńnie hrupy Suśvietnaha banka, taksama zajaŭlała, što razhladaje papraŭki ŭ zakon ab pryvatyzacyi jak viartańnie «załatoj akcyi». Na dumku IFC, pryniaćcie hetaha zakonaprajekta ab pryvatyzacyi admoŭna adabjecca na inviestycyjnym imidžy Biełarusi, prytoku ŭ krainu zamiežnych inviestycyj, źnizić cikavać inviestaraŭ da pryvatyzacyi dziaržaŭnych pradpryjemstvaŭ.
