Siońnia ŭviečary projdzie finał adboru na «Jeŭrabačańnie». Čym cikavy siońniašni finał? Pa-pieršaje, upieršyniu za niekalki hadoŭ u im NIE ŭdzielničaje Alena Łanskaja (ale nie chvalujciesia, jana praśpiavaje jak zaprošany hość), adnak za prava vystupić u Danii pazmahajecca Alaksandr Saładucha. «Naša Niva» prapanuje vam zahadzia pasłuchać pieśni finału i zrabić staŭki na pieramožcu.
Natalla Tamieła – Not What I've Been Looking For
Natalla Tamieła kaliści była salistkaj arkiestra Finbierha, paśla zapisała adzin albom i z haryzontaŭ źnikła. Raptoŭna jaje imia źjaviłasia ŭ śpisie pretendentaŭ na Nacyjanalnuju muzyčnuju premiju ŭ naminacyi «Najlepšy pop-artyst», što trochi ŭsich ździviła.
Jaje pieśnia «Nie toje, što ja šukała» – heta lohki džaz, ci jak jaho jašče nazyvajuć «hanhstarski śvinh»
— samaje papularnaje džazavaje adhalinavańnie siarod restarannych muzykaŭ. Darečy, pałova pretendentaŭ na dziciačaje Jeŭrabačańnie pracavali ŭ takoj maniery.
Nuteki – Fly Away
Nuteki pazicyjanujuć siabie jak rok-hurt, pieśnia ŭ ich całkam układajecca ŭ radyjny farmat, takich hurtoŭ tysiačy, što nijak nielha ličyć minusam. Adno, što nie zrazumieła,navošta hetym chłopcam «Jeŭrabačańnie»? I da taho ž,
chaciełasia b bačyć ad našaj krainy niešta z bolšaj dolaj nacyjanalnaha kałarytu. A nie «jak u Brytanii».
Arciom Michalenka – Rapsodyja №1
A voś adzin z samych niezvyčajnych udzielnikaŭ adboru. Pa-pieršaje, udzieł u konkursie ź pieśniaj, nazva jakoj utrymlivaje słova «rapsodyja»,– heta ŭžo niezvyčajna. Pa-druhoje,
hołas u spadara Michalenki nahadvaje kali nie pra opieru, to pra savieckuju estradu kštałtu Chila i Kabzona.
Pieśnia akazałasia ruskamoŭnaj baładaj pra kachańnie, u styli «Viečnaha kachańnia» Harvarenca-Aznavura, adnak z elektronnym dadatkam. Šancaŭ niašmat.
Maćviej Kupier i DUX – Strippers
A voś
pieśnia pra stryptyzioraŭ, dakładniej, pra toje, kudy jany padzienucca, kali sastarejuć.
U stvoranaj ułasnymi rukami charaktarystycy pieśni spadar Kupier padkreślivaje, što maładość nie viečnaja, zatoje «viečnaja muzyka, jaskravaja, jakaja zasłuhoŭvaje pieramohi na «Jeŭrabačańni»». Na fonie astatnich udzielnikaŭ — dakładna jaskravaja.
Tea – Cheesecake
Pieśnia pra čyzkiejk, jaki razam sa smuzi, penkiejkami i inšymi mafinami — lubimaja ježa luboha chipstara. Tolki pieśnia nie pra jaho, a pra kachańnie, jak śpiavała adna ŭdzielnica «Jeŭrabačańnia» 90-ch. Ź minułaha hoda stała zaŭvažna, što biełaruskija muzyki ŭ bolšaj stupieni zasvoili kanony papularnaj jeŭrapiejskaj muzyki, ale ci toje dapamoža?
Mienavita takija pieśni na konkursie zastajucca ŭ paŭfinale.
Daryja – Starlight
A voś takija pieśni traplajuć u finał i navat u im pieramahajuć. Čamu? Treba pytacca ŭ amataraŭ «Jeŭrabačańnia», jakija hałasujuć. Pieśnia zroblena ŭ stylistycy apošnich pieramožcaŭ konkursa.
Miełodyja moža zasieści ŭ hałavie, i anhlijskaja mova ŭ Daryi vielmi niakiepskaja.
Alena Siniaŭskaja – Via Lattea
Darečy, salistka Teatra opiery i baleta. Situacyja, kali opiernyja prafiesijanały iduć u estradu, sprečnaja pa sutnaści, adnak numar atrymaŭsia cikavy. Praŭda, možna było b abyścisia biez elektroniki.
Pieśnia pryhožaja, ale dla «Jeŭrabačańnia» nadta ŭžo niefarmatnaja.
Alina Moščanka – Angel Crying
Biez čaho nie byvaje «Jeŭrabačańnia»? Biez baład pad fartepijana!
Jany jość u nas. Alina Moščanka zapisała typovuju pieśniu ŭ styli «jak na Jeŭrabačańni» — «Płač anioła», niekatoryja mieładyčnyja pasažy nahadvajuć pra Lindu Ronstat, ad čaho robicca vielmi pryjemna, adnak ci nie lepš śpiavać takija pieśni biez usialakich konkursaŭ?
Žanet – You Will be Here
A voś jašče adna kłavišnaja bałada, adnak pa jakaści sastupaje papiaredniaj: kali ŭ Moščanki miełodyja mieła pryhožuju «chvalevuju» kanstrukcyju, to
Žanet zapisała typovy dla našaj estrady numar,
što praŭda, na anhlijskaj movie. Stavić na jaje my b nie raili.
Nastaśsia Małaškievič – Runaway
Kolki suśvietnych chitoŭ było zapisana z hetaj nazvaj! Ale tut inšaja sprava — jašče adna kłavišnaja bałada, jakija vystavilisia naprykancy adboru jak na parad.
Hołas u spadaryni Małaškievič cikavy – hłyboki, nizki,
adnak heta toj vypadak, kali vykanańnie lepšaje za pieśniu. Čakajem na radyjo.
Switter Boys feat Kate&Volga Karol – Viečnaja lubov
Darečy, u rasiejskaj viersii Kate&Volga hučyć jak Katia-Vołha. Čamu pieśnia nazyvajecca «Viečnaje kachańnie» i pry hetym zapisana pa-anhlijsku, dy pry čym tut Monika Biełučy, jakuju «lubić kožny chłopiec» i jakaja ryfmujecca z Gucci. Ad redakcyi padkazvajem, što jość jašče kłasičnaja ryfma – hoochie-coochie. Ale ładna, bo pieśnia niezvyčajnaja – trojčy mianiaje miełodyku, i nastroj, i styl.
Niešta padkazvaje, što našaje žury ich u Daniju nie puścić.
Napoli – Stay with me
Voś jašče adna pieśnia pra kachańnie z kłavišami i mužčynskim/žanočym vakałam. Voś cikava, kali kampazitary pišuć pieśni pad «Jeŭrabačańnie», na što jany aryjentujucca? Časam takoje adčuvańnie, što na zachodnich udzielnikaŭ paŭfinałaŭ. Adnak ci heta plonny padychod?
Maks Łorens&Dzidziula - Now you're gone
A voś
mierkavanyja favaryty — duet hitarysta DziDziuli i Maksa Łorensa, tekst pieśni im napisaŭ były ŭdzielnik Deep Purple Džo Lin Ternier (strašna papularny ŭ rasiejskich kłubach). Cikava, abvinavacić DziDziulu ŭ drennym huście jazyk nie pavierniecca, Ternier taksama ŭ muzycy nie pieršy dzień, adnak pieśnia atrymałasia dosyć zvyčajnaja. «Aptymalnyja raskłady, a čahości nie staje», — jak śpiavaŭ Lavon Volski.
Tasha Odi - «Empty Universe»
Pieradapošni ŭdzielnik — Tasha Odi ź pieśniaj pra pusty suśviet. Heta taksama typovaja farmatnaja pieśnia dla prasłuchoŭvańnia pa radyjo, ciaham «Jeŭrabačańnia» my pačujem, jak minimum, takich try. Iznoŭ toje ž pytańnie: čamu, čamu nielha zrabić što-niebudź choć minimalna adroznaje ad farmatu «jedu na pop-konkurs»?
Pieśni 15-ha ŭdzielnika, Alaksandra Saładuchi, u internecie pakul niama, pakolki
ŭdzieł hałoŭnaha pop-muzyki krainy ŭ finale adboru staŭ siurpryzam dla ŭsich, to i chaj jahonaja pieśnia z šmatabiacalnaj nazvaj «Maja žančyna» zastaniecca siurpryzam.
