fota z sajta Jeŭraradyjo
Čaćviorty dzień razhladu spravy «Ekamiedservisa» pačynajecca z dopytu paciarpiełych — baćki i maci pamierłaj Julii Kubaravaj. Juryj Kubaraŭ raskazvaje, što spadziavaŭsia na lepšaje da samych apošnich dzion žyćcia svajoj dački.
«Kali my jaje hładzili pa žyvacie ŭ 4-aj balnicy, pierad samaj śmierciu, jana sprabavała ściskacca. My doktara paklikali, padzialilisia svajoj radaściu. A jon nam skazaŭ nie radavacca zaŭčasna».
Viečar taho dnia Juryj i Ała Kubaravy pravodziać u internecie — šukajuć značeńnie zaŭvažanych simptomaŭ.
Niekalki hadzin za manitoram zabivajuć apošniuju nadzieju — adrazu niekalki krynic śćviardžajuć: ubačanaje śviedčyć ab śmierci hałaŭnoha mozha. Užo praź niekalki dzion ź Minska prychodzić trahičnaja viestka — Jula pamierła. Užo ŭ morhu paśla ŭskryćcia baćkam havorać, šansaŭ vyžyć u ich dački nie było z samaha pačatku.
Adnaŭlajuć Kubaravy ŭ sudzie i pieršyja hadziny dački paśla apieracyi.
Ź ich słovaŭ, padčas apieracyi z pamiaškańnia vybiehła adna ź miedsiaścior. Jana była mocna ŭstryvožanaja niečym, ale Kubaravym skazała: «Z vašaj dačkoj usio narmalna».
Viarnułasia miedsiastra ŭ pałatu tolki praz 5-7 chvilin, čym zajmałasia i dzie była ŭ hety čas — nieviadoma.
Dziŭnyja rečy praciahvajucca i paśla zaviaršeńnia apieracyi. Z apieracyjnaj u pałatu Juliju vyvoziać na katałcy. Baćkam dazvalajuć być pobač z dačkoj praź dziesiać chvilin. Za hety čas u pałatu zachodziać miedsiostry, trojčy zahladvaje aniestezijołah Šuraŭ. A voś lečačy urač, chirurh Sierabro tak i nie zachodzić da svajoj pacyjentki.
Amal adrazu paśla apieracyi jon sychodzić ź miedcentra. Źbiantežanym baćkam tłumačyć: «Niapravilna zaparkavaŭ mašynu, treba syści».
U 21.30 z «Ekamiedservisa» sychodzić aniestezijołah Šuraŭ. Razbudzić pacyjentku jon tak i nie zmoh, ale u 21.45 u jaho ciahnik u Maskvu. Budzić dačku baćkam zabaraniaje i miedsiastra.
Havoryć, što kali razbudzić Julu ciapier, jana ŭsiu noč budzie mučacca ad bolu.
Baćki tym časam pakutujuć ad pradčuvańniaŭ — Jula vielmi ciažka dychaje, na jaje tvary ŭzduvajucca vieny, na hałasy rodnych nijak nie reahuje. «U mianie była dumka, niejak dziejničać. Ale jak? Vyklikać chutkuju ŭ budynak balnicy?» — Juryj Kubaraŭ ledźvie strymlivaje ślozy, stojačy pierad sudździoj. Jaho žonka Ała strymacca nie moža, havoryć pra dumki ab suicydzie, ad jakoha abaraniaje tolki viera ŭ Boha.
Kubaravy raskazvajuć, što adhavorvali dačku ad apieracyi — šnar na jaje nosie byŭ małazaŭvažnym. Ale kančatkova pierakonvajuć ich u nieabchodnaści apieracyi u… «Ekamiedservisie».
Chirurh Sierabro śćviardžaje, što z časam šnar budzie tolki pavialičvacca, a tamu apieracyja patrebnaja.
Raskazvajuć baćki i pra jašče adnu trahičnuju akaličnaść.
Kala dziesiaci hadoŭ tamu Julija Kubarava ŭžo sprabavała vypravić šnar na nosie. Adnak tady apieracyju pravodzili biez narkozu, i jana prajšła nie vielmi ŭdała. Dziaŭčyna nastolki zapomniła bol, adčuty tady, što šukała miedcentr, dzie robiać takija apieracyi mienavita pad ahulnym narkozam.
«Jana chacieła takuju apieracyju, jakaja budzie prachodzić tolki pad ahulnym nakozam. Sprava ŭ tym, što Jula ŭžo mieła adnu apieracyju na nosie, joj tady było 15-16 hadoŭ. Heta vielmi mocny bol. Daktary havorać, što toj, chto prajšoŭ praz taki bol, jon nikoli bolš nie pahodzicca na apieracyju biez narkozu», — raskazvaje baćka Juryj.
Z budynka «Ekamiedservisa» Kubaravych kala 22 hadzin 26 sakavika 2012 hoda vyhaniaje achoŭnik. Praź dźvie hadziny siudy za ich dačkoj pryjazdžaje vyklikanaja miedsiastroj «chutkaja».
A ŭ hadzinu nočy baćkam Julii telefanuje chirurh Sierabro i paviedamlaje, što Julu zabrali ŭ 4-y špital Minska. Na pytańnie, što ź joj, jon adkazvaje prosta: «Ja nie viedaju».
