 Andrej Klimaŭ |
Milicyjant Jury Barynkoŭ, jaki vykonvaje abaviazki načalnika departamentu vykanańnia pakarańniaŭ, admoviŭsia paviedamić karespandentu «Svabody», kudy nakiravali apazycyjnaha palityka. Adnak u Mienskim śledčym izalatary, dzie byłoha deputata trymali bolej za paŭhodu, udałosia atrymać dakładnyja źviestki adnosna Klimava: učora, 10 kastryčnika, jaho nakiravali ŭ Mazyrskuju kaloniju strohaha režymu.
U jakich umovach palityku daviadziecca žyć paŭtara hoda?
Voś što paviedamiŭ pra Mazyrskuju kaloniju strohaha režymu žurnalist Siarhiej Ł., jaki niekalki hadoŭ tamu naviedvaŭ kaloniju jak supracoŭnik miascovaj hazety:
«Raniej tam byŭ prafilaktoryj dla alkaholikaŭ. Znachodzicca kalonija nia ŭ horadzie, a za horadam. Ja bačyŭ tam vytvorčaść — niejki drevapierapracoŭčy cech i žalezabetonnuju vytvorčaść. Nas zavodzili ŭ pakoi, dzie žyvie prykładna dvaccać čałaviek. Pamiataju, što viaźni skardzilisia na niedachop advakataŭ i pravavoj dapamohi».
Lider haradzienskich pradprymalnikaŭ Valer Levanieŭski, jaki adbyŭ u biełaruskich kalonijach dva hady pavodle abvinavačańnia ŭ paklopie na prezydenta, kaža, što Mazyrskaja kalonija maje reputacyju «nia vielmi žorstkaj».
«Mnie nieviadoma, kab tam za apošnija hady byli bunty viaźniaŭ ci niejkija nadzvyčajnyja zdareńni», — kaža Valer Levanieŭski. Pavodle jaho źviestak, u kalonii trymajuć kala 2,5 tysiač viaźniaŭ, jakija padzielenyja na 24 atrady.
U specadździele Mazyrskaj kalonii paviedamili, što Andreja Klimava ŭ kaloniju jašče nie pryvieźli. «Čarhovy «etap» budzie zaŭtra, 12 kastryčnika», — skazaŭ milicyjant.
