Raźvitańnie ź Michałam Žyźnieŭskim adbyłosia ŭ dzień jaho naradžeńnia, 26 studzienia. Siońnia jamu spoŭniłasia b 26 hadoŭ.
Majdan siońnia byŭ u žałobie. Nie było ni piesień, na tancaŭ, ni tradycyjnaha niadzielnaha mitynhu.
Adpiavali Žyźnieŭskaha śviatary Ukrainskaj pravasłaŭnaj carkvy Kijeŭskaha patryjarchata. Na raźvitańnie pryjšli lidary ŭkrainskaj apazicyi, siarod jakich Vital Kličko i Arsień Jacaniuk.
Ź Biełarusi na pachavańnie pryjechaŭ paet Uładzimir Niaklajeŭ.
Nieśli trunu siabry zabitaha, u kamuflažy i maskach.
Tysiačy ludziej išli za trunoj, jakuju na rukach pranieśli ad Michajłaŭskaha Załatavierchaha sabora praz Majdan, Chryščacikam. Jaho pranieśli paŭz barykady, na jakich jon zahinuŭ. I na chvilinu Majdan zamior u maŭčańni.
Ukrainskaja daroha biełarusa skončyłasia. Pachavajuć jaho na radzimie, u Homieli.
Michał Žyźnieŭski zahinuŭ 22 studzienia ŭ Kijevie ŭ časie sproby śpiecnazaŭcaŭ, viernych Viktaru Janukoviču, ačyścić vulicu Hrušeŭskaha. Kula, vypuščanaja sa zbroi 12-milimietrovaha kalibra, prajšła jahonaje cieła naskroź.
Pavodle vynikaŭ niezaležnaha rasśledavańnia, zabityja na vulicy Hrušeŭskaha, u tym liku Žyźnieŭski, zahinuli ad papadańnia kuli, vypuščanaj z hładkastvolnaha ružža. Pryčym ahoń vioŭsia ź blizkaj adlehłaści. Vykazvalisia mierkavańni, što asobnyja ekstremisty ź liku bajcoŭ śpiecpadraździaleńniaŭ zaradžali takija łatunnyja palaŭničyja kuli ŭ ružžy, jakija vykarystoŭvajucca dla stralby humovymi kulami. Technična heta mahčyma.
