Jak paviedamlaje sajt viedamstva, na elektronny adras Hienprakuratury pastupiła bolš za 500 identyčnych zvarotaŭ hramadzian z prośbami ab uzmacnieńni adkaznaści za žorstkaje abychodžańnie z žyviołami
i nadzialeńni słužbovych asob MUS pravam składać pratakoły ab administracyjnych pravaparušeńniach za ździajśnieńnie takich pravaparušeńniaŭ. Anałahičnyja prapanovy byli razhledžany Hienprakuraturaj u studzieni hetaha hoda na padstavie lista Nacyjanalnaha centra zakanadaŭstva i pravavych daśledavańniaŭ i zvarotaŭ arhanizacyj pa abaronie žyvioł, adznačajecca ŭ paviedamleńni.
«Na našu dumku, žorstkaje abychodžańnie z žyviołami, vynikam jakoha stanovicca nie tolki jaho hibiel, ale i kalectva, kali jano ździejśniena z chulihanskich, karyślivych abo inšych nizkich mierkavańniaŭ, maje hramadskuju niebiaśpieku, ułaścivuju złačynstvu, bo takoje dziejańnie pa svaim źmieście i skiravanaści zamachvajecca na hramadskuju maralnaść i pryčyniaje značnuju škodu intaresam, jakija achoŭvaje kryminalnaje zakanadaŭstva», — adznačyli ŭ Hienprakuratury.
U suviazi z hetym Hienprakuratura ŭzhadniła ź niekatorymi zaŭvahami prapanavanuju Nacyjanalnym centram zakanadaŭstva i pravavych daśledavańniaŭ redakcyju artykuła 339-1 Kryminalnaha kodeksa (žorstkaje abychodžańnie z žyviołami), a taksama padtrymlivaje prapanovu ab tym, kab nadać słužbovym asobam MUS prava składać pratakoły na padstavie artykuła 15.45 KaAP, ab čym prainfarmavany Centr zakanadaŭstva i pravavych daśledavańniaŭ.
Raniej prapanovu ab uzmacnieńni žorstkaści adkaznaści za niehumannaje abychodžańnie z žyviołami padtrymała Ministerstva zamiežnych spraŭ. U kancy studzienia ŭ adkaz na zvarot arhanizacyj pa abaronie žyvioł MZS paviedamiŭ, što ŭ 2013 hodzie ŭnosiŭ prapanovy ŭ Administracyju prezidenta ab vyznačeńni pravavych asnoŭ abychodžańnia z žyviołami i ŭzmacnieńni žorstkaści adkaznaści za niehumannaje abychodžańnie ź imi. U vyniku administracyja daručyła Nacyjanalnamu centru zakanadaŭstva i pravavych daśledavańniaŭ sumiesna z zacikaŭlenymi dziaržaŭnymi orhanami vyvučyć metazhodnaść uklučeńnia ŭ prajekt płana zakanatvorčaj dziejnaści na 2015 hod prajekta zakona, jaki vyznačaje pravavyja asnovy abychodžańnia z žyviołami.
Akramia taho, centru daručana vyvučyć metazhodnaść uzmacnieńnia žorstkaści adkaznaści za niehumannaje abychodžańnie z žyviołami ŭ ramkach raboty nad zakonaprajektam, jaki znachodzicca ŭ pałacie pradstaŭnikoŭ i praduhledžvaje karekciroŭku kryminalnaha zakanadaŭstva i zakanadaŭstva ab administracyjnych pravaparušeńniach.
