 Isłam Karymaŭ |
 B. Ferera-Valdner |
Jak miarkujecca, na svajoj siońniašniaj sustrečy ŭ Luksemburhu kiraŭniki dyplamatyčnych viedamstvaŭ krain EZ admieniać zabaronu na vydaču vizaŭ, uviedzienuju ŭ dačynieńni da šerahu vysokich adkaznych asob Uzbekistanu paśla andyžanskich padziej 2005 hodu. Na dumku naziralnikaŭ, na hetaje rašeńnie paŭpłyvała žadańnie Bruselu nie tarmazić raźvićcio ekanamičnych adnosinaŭ z hetaj klučavoj krainaj Centralnaj Azii, a taksama prajaŭlenaja z boku Taškientu hatovaść abmiarkoŭvać prablemu pravoŭ čałavieka.
U vystupie napiaredadni pasiedžańnia rady ministraŭ zamiežnych spraŭ kamisar EZ pa vonkavych stasunkach Benita Ferera‑Valdner adznačyła, što vizavaja zabarona budzie źniataja na šeść miesiacaŭ i nia budzie ŭvodzicca znoŭ u tym vypadku, kali va Ŭzbekistanie nia budzie zafiksavana novych parušeńniaŭ pravoŭ čałavieka.
«Pahladzim, kudy nas heta pryviadzie. Prynamsi, nam varta pasprabavać. Jak ja ŭžo adznačała, Uzbekistan jość krainaj z samym vialikim nasielnictvam u rehijonie, i heta klučavy partner u našaj centralnaazijackaj stratehii. Nia dumaju, što my možam nie zvažać na heta. Miarkuju, što varta ŭciahvać Uzbekistan u dyjaloh, i krok za krokam pracavać nad palapšeńniem tam sytuacyi z pravami čałavieka».
Pavodle słovaŭ spadaryni Ferera‑Valdner, EZ pryznaje značnaść «pieršych krokaŭ», zroblenych Taškientam nasustrač Bruselu. Siarod ich nazyvajucca dva raŭndy kansultacyj nakont padziejaŭ u Andyžanie i adna sustreča pa pytańniach pravoŭ čałavieka, umoŭnaha vyzvaleńnia palityčnych viaźniaŭ i mahčymaj admieny śmiarotnaj kary. Kamisar adznačyła, što dla praciahu bieśpieraškodnaha raźvićcia dvuchbakovych adnosin uzbeckim uładam daviadziecca ŭnieści «ceły šerah» istotnych źmienaŭ u zakanadaŭstva i pravaprymianialnuju praktyku ŭ halinie pravoŭ čałavieka.
EZ zachoŭvaje embarha na pastaŭku Uzbekistanu zbroi. Adnak hetaja zabarona maje naminalny charaktar. Jak pryznajuć sami eŭračynoŭniki, Taškient maje mahčymaść bieśpieraškodna zakupać patrebnyja jamu systemy ŭ Kitai j Rasiei. Jak adznačajuć eksperty, apošniaja ŭ poŭnaj miery skarystałasia achałodžańniem adnosinaŭ Isłama Karymava z Zachadam. Hetak, u 2006 hodzie Taškient uznaviŭ aktyŭnaje siabroŭstva ŭ sfarmavanym Maskvoj vajennym bloku ADKB.
