Ci źviazany rasiejski kłasik Alaksandr Puškin ź Biełaruśsiu?
Pry adkazie na hetaje pytańnie zvyčajna ŭzhadvajuć jaho dvuchrazovaje padarožža pa Biełaruskim trakcie (śpiarša ŭ Adesu, a potym u Michajłaŭskaje), a taksama pra biełaruskija karani jaho niańki, Aryny Radzivonaŭny. Ale samy viadomy fakt –
isnavańnie asoby, jakaja stała pratatypam hałoŭnaha hieroja ŭ tvory «Dubroŭski». Im źjaŭlaŭsia niebahaty biełaruski šlachcic pa proźvišču Astroŭski.
Pavieł Naščokin, siabra Puškina, raskazaŭ jamu historyju Astroŭskaha, «jaki mieŭ praces z susiedam za ziamlu, byŭ vycieśnieny z majontka, zastaŭšysia z adnymi sialanami, staŭ rabavać spačatku padździačych, potym i inšych».
Realny Astroŭski, jak i Dubroŭski, byŭ vymušany nastaŭničać u susiedniaha pamieščyka. Paźniej trapiŭ u astroh. Ale źbieh adtul i nie byŭ adšukany.
Da hetaj historyi źviarnuŭsia kampazitar Kim Brejtburh. Jon viadomy jak aŭtar muzyki da tekstaŭ papsovych pieśniaŭ, jakija śpiavajuć pradstaŭniki rasijskaj estrady. Jaho miuzikł nazyvajecca «Dubroffski» i napisany jašče ŭ 2010 hodzie.
Letaś u śpiavački Iryny Darafiejevaj, jakaja źjaŭlajecca zahadčycaj kafiedry mastactva estrady ŭ Biełaruskim dziaržaŭnym univiersitecie kultury i mastactvaŭ, uźnikła ideja: zamiest taho kab zajmać studentaŭ asobnymi praktykavańniami, treba, kab jany paŭdzielničali ŭ pastanoŭcy celnaha tvora.
Vybar spyniŭsia na «Dubroffskim».
Režysioram budzie Mikałaj Androsaŭ, jaki ŭ 2011 hodzie staviŭ u Muzyčnym teatry «Błakitnuju kamieju», inšy miuzikł Brejtburha.
Pradziusary prajekta — sam kampazitar i Juryj Savaš, pradziusar Darafiejevaj.
U «Dubroffskim» buduć zaniatyja kala 200 čałaviek. Pieravažnaja bolšaść ź ich –- studenty Univiersiteta kultury i mastactvaŭ.
Premjera zapłanavana na kaniec maja 2014 hoda.
