U rasiejskim kancernie “Hazprom” viedajuć pra prapanovu Alaksandra Łukašenki vyzvalić ad padatkaŭ tranzyt rasiejskaha hazu pa terytoryi Biełarusi ciaham piaci hadoŭ. Adnak aficyjnaj reakcyi na hetuju prapanovu “Hazprom” pakul nie padaŭ.
Svaju prapanovu Alaksandar Łukašenka abumoŭlivaje hetak: Rasieja musić admovicca ad budaŭnictva hazapravodu “Nord Stream” na karyść druhoj vietki hazapravodu Jamał-Eŭropa, jaki prachodzić pa biełaruskaj terytoryi, tady Biełaruś na 5 hadoŭ admovicca ad padatkaabkładańnia hazavaha tranzytu praz našu krainu.
Ekanamičnaja ahladalnica Taciana Manionak tłumačyć vyhadu hetaha prajektu dla Biełarusi:
“U nas pabudavanaja ŭžo adna nitka Jamał-Eŭropa. I na hetaj prastory ŭžo praduhledžanaja ŭsia infrastruktura dla pabudovy jašče adnoj nitki. Jość užo, prynamsi, advod ziamli, hazanapaŭnialnyja stancyi taksama ŭžo pabudavanyja. Tamu dla Biełarusi heta sapraŭdy było b vielmi vyhadna”.
Eksperty ličać, što zaviaršyć budaŭnictva druhoj nitki hazapravodu Jamał-Eŭropa možna było b hady za dva.
Adnak pośpiech prajektu zaležyć nia tolki ad Rasiei j Biełarusi. Biessensoŭna zajmacca hetaj spravaj, kali da jaje nie padklučycca jašče i Polšča. Inakš haz nia trapić u krainy Zachodniaj Eŭropy. Taciana Manionak kamentuje:
“Treba, kab i palaki pryniali hety haz, kab jany davali dazvoł. Kali budavali pieršuju nitku, dyk “Hazpromu” heta kaštavała šmat nervaŭ. Reč u tym, što palaki ź ciažkaściu adviali ziamlu — tam ža pryvatnaja ŭłasnaść.
A z druhoha boku, palaki nia chočuć vielmi mocna zaležać ad “Hazpromu”. Ja viedaju, u ich jość pamknieńnie kuplać narveski haz. Tamu što lubaja cyvilizavanaja kraina pavinna mieć nia bolš za 30% z adnoj krynicy hetaha enerhanośbitu”.
Pavodle maskoŭskich krynicaŭ, u investycyjnaj prahramie “Hazpromu” na 2008 hod prajektu druhoj nitki trubapravodu Jamał-Eŭropa niama.
Košt druhoj nitki Jamał-Eŭropa aceńvajecca na 2,5 miljarda dalaraŭ, a budaŭnictva “Nord Stream” — na 7-12 miljardaŭ. Ale “Nord Stream” daje mahčymaść Rasiei nie zaležać ad tranzytnych krainaŭ.
Što tyčycca koštaŭ hazu dla Biełarusi na nastupny hod, dyk eksperty aceńvajuć ich na 168 dalaraŭ za tysiaču kubametraŭ suprać 100 dalaraŭ sioleta.
