Losy: Li i Stanisłaŭ Radzivił
Li Buŭje i kniaź Stanisłaŭ Albrecht Radzivił pabralisia šlubam 19 sakavika 1959 h. Dla małodšaj siastry Džeki Kienedzi heta byŭ druhi šlub. Dla Stanisłava Radziviła — treci.
 Siostry Žaklin i Li |
Praź piać miesiacaŭ paśla viasiella ŭ pary naradziŭsia syn — Entani. A jašče praz hod — dačka, Hanna Kryścina.
Pavodle hienealahičnaha dreva rodu Radziviłaŭ, Stanisłaŭ Albrecht źjaŭlajecca pradstaŭnikom piatnaccataha pakaleńnia Radziviłaŭ. Dziedam kniazia byŭ Ferdynand Radzivił — pasoł polskaha siejmu, babulaj — Piełahieja Sapieha. Baćkami — polski senatar Januš Radzivił i kniahinia Hanna Lubamirskaja, jakaja, zhodna ź bijahrafičnymi dadzienymi, pamierła ŭ 1947 h. u savieckim lahiery.
Bolšuju častku žyćcia ź Li, jakaja ŭ ZŠA viadomaja nia mienš za Žaklin Kienedzi, kniaź Stanisłaŭ pražyŭ u Anhlii.
Zrešty, pra savieckaje žyćcio ŭ Štatach Radziviły taksama nie zabyvali.
Džon Kienedzi i Stanisłaŭ Radzivił nastolki siabravali, što navat chryścili dziaciej adno adnamu, — kaža viadomy biełaruski ekskursavod Anatol Varava. — Heta byŭ zorny čas Radziviłaŭ u XX stahodździ — śviatło słavy amerykanskaha prezydenta patrapiła i na hety kniaski rod, jak praz mocny pražektar. Mienavita ŭ hety čas pra Radziviłaŭ było vydadziena niamała knih u Eŭropie i Amerycy.
Paśla zabojstva prezydenta ZŠA Džona Kienedzi mienavita Li i Stanisłaŭ paznajomili zabituju horam Džeki z hreckim multymiljarderam Arystotelem Anasisam. U adnoj ź bijahrafij Žaklin peryjadu jaje šlubu z Anasisam pryhadvajecca takaja cikavaja historyja.
Niejak na adnoj ź viečarynak sabaka haspadaroŭ zžavaŭ sabalinaje manto Li Radzivił. Kniaź byŭ raźjušany. «Čaho ty tak pierajmajeśsia? Zaŭtra my nabudziem inšaje manto, a rachunak pierašlem Ary» — supakojvała jaho Džeki.
 Li Radzivił |
Sužoncy Radziviły pražyli razam piatnaccać hadoŭ, a zatym razyšlisia. Kniaź pamier u 1976 h. va ŭzroście 62 hadoŭ. Jon pachavany ŭ londanskaj carkvie Śv. Hanny.
Li Radzivił paśla razvodu z kniaziem była zaručanaja z kalifarnijskim mahnatam Ńjutanam Kopam, a ŭ 1988 h. stała žonkaj metra Halivudu — režysera Herberta Rosa. Hety šlub raspaŭsia ŭ 2002 h.
Losy: Entani i Kerał Radzivił
Historyja hetaj jarkaj pary žurnalistaŭ, jakija atrymali za svaju pracu nie adnu amerykanskuju premiju Emmy, sumnaja. Jak napisała dla časopisa Harper's Bazaar sama Kerał, «u 20 hod ja była aficyjantkaj, u 25 zdymała «čyrvonych kchmeraŭ» na bajavych pastach, u 30 ažaniłasia z čałaviekam, jaki pamiraŭ ad raku, u 35 vyśvietliłasia, što maje lepšyja siabry i muž miortvyja».
Pra znajomstva z Entani Radzivił jana havoryć:
«Jak mahła dziaŭčynka z Saferna sustreć kniazia i da taho ž plamieńnika prezydenta Kienedzi?» A nasamreč było tak: jany paznajomilisia, kali Kerał pracavała na šoŭ Prime Time Live na ABCNews, pradusaram jakoha byŭ Entani. «Niechta paśla paviedamiŭ mnie, miž inšym, što heta kuzen Džona F. Kienedzi‑małodšaha, plamieńnik Džeki Anasis, a jaho maci — siastra Džeki — Li Radzivił», — piša Kerał.
Asobna varta adznačyć blizkija suviazi pamiž stryječnymi bratami — Entani Radziviłam i Džonam Kienedzi‑małodšym. U 1996 hodzie kniaź navat byŭ śviedkam na tajemnym viasielli Džona i Kerałajn Biset, jakaja, darečy, stała lepšaj siabroŭkaj Kerał Radzivił.
Ci taki vypadak. Adnojčy Entani ŭ nieŭśviadomlenym stanie byŭ pryviezieny ŭ špital. Džon prymčaŭ u jaho pałatu, abniaŭ brata i pačaŭ śpiavać pieśni ź ich dziacinstva. Entani pryjšoŭ u prytomnaść, taksama zaśpiavaŭ, a praz peŭny čas adčuŭ siabie nastolki lepiej, što jaho navat pieraviali sa špitalu dadomu.
Paśla trahičnaj śmierci Kienedzi‑małodšaha i Kerałajn Biset la bierahoŭ štatu Masačusets śmiarotna chvoramu Entani daviałosia ŭstać z łožku. Jon pryniaŭ udzieł u žałobnaj cyrymonii i vystupiŭ u jakaści vykanaŭcy zapavietu svajho brata. A praz try tydni — 10 žniŭnia 1999 h. — kniaź Radzivił pamier. Jamu było 40 hod.
Losy: Li Radzivił i Kerał Radzivił
Małodšaja siastra Žaklin Kienedzi ŭsio jašče žyvie ŭ Ńjo‑Jorku. Li Radzivił — byłoj aktorcy, piśmieńnicy i śvieckaj damie — ciapier 74 hady. U 2000 hodzie razam ź niaviestkaj Kerał jana stvaryła fond dapamohi pačynajučym režyseram‑dakumentalistam. Heta było zroblena ŭ pamiać pra Entani Radziviła.
Kerał Radzivił stała znakamitaj paśla publikacyi jaje aŭtabijahrafičnaj knihi «Što zastajecca: pamiać, losy, siabroŭstva i kachańnie». U ramanie apisvajecca jaje dziacinstva, karjera i historyja baraćby sa śmiarotnaj chvarobaj muža. U 2005 hodzie ŭ ZŠA jon uvajšoŭ i śpis bestseleraŭ. A sama piśmieńnica stała častaj hościaj znakamitych na ŭvieś śviet šoŭ Opry Ŭinfry i Łary Kinha. Ciapier Kerał Radzivił pracuje ŭ časopisie Glamour, viadzie kalonku «Sustreča padčas łanču».
Losy: Radziviły
Usia Eŭropa ŭ siaredzinie minułaha stahodździa znoŭ zahavaryła pra Radziviłaŭ. Ale jak tak zdaryłasia, što ŭ Biełaruś nie pratačylisia navat mizernyja śviedčańni pra radzinnyja suviazi «tutejšaha» kniazia i amerykanskaha prezydenta?
U saviecki čas historyki nie ŭskładniali sabie žyćcio vyvučeńniem losaŭ arystakrataŭ, — kaža Anatol Varava. — Pradstaŭniki znakamitaj siamji i, da taho ž, kataliki — Radzivili ŭsprymalisia jak absalutna čužy element.
‑ A mahčyma, jak polski, litoŭski ci navat pruski rod? Bo sprečki pra toje, «čyje Radziviły», nie ścichajuć i da siońnia.
— Naščadak kniazioŭ Amścisłaŭskich i Zasłaŭskich Andžej Ciechanaviecki ŭ knizie pra Michała Kazimiera Ahinskaha adkazaŭ abyvatalam, što pierajmajucca takim pytańniem: «Jany nie byli ni palakami, ni biełarusami, ni litoŭcami. Jany byli Radziviłami». Heta my chočam pieranieści z XXI stahodździa ŭ minułyja stahodździ svaje ŭjaŭleńni pra «piatuju hrafu», a jany prosta žyli na hetaj ziamli i byli jaje patryjotami. «Tutejšymi» byli.
Pradstaŭnikom jakoj linii Radziviłaŭ varta ličyć Stanisłava Albrechta?
— Kaliści Radzivił Sirotka razam z dvuma svaimi bratami padzialiŭ majomaść rodu na Niaśviskuju, Kleckuju i Ołyskuju (na poŭdni Biełarusi) ardynacyi. Niaśviskaja linija ŭ prostym pakaleńni spyniła svajo isnavańnie ŭ 1813 hodzie sa śmierciu Daminika Radziviła. Paśla hetaha adbyŭsia padzieł majomaści niaśviskaj ardynacyi, i spadkajemcami jaje stali pradstaŭniki kleckaj haliny, ź jakoj jakraz i pachodzić Stanisłaŭ — muž małodšaj siastry Žaklin Kienedzi. Jany praciahvajuć 600‑hadovuju dynastyju Radziviłaŭ i da siońnia.
