16 kastryčnika skončyłasia zaciahnuty sudovy praces paeta Alesia Razanava i Viktara Markaŭca suprać aperatara mabilnaj suviazi STAA «Mabilnyja TeleSystemy». Tvorcy sprabavali adstajać u sudzie aŭtarskija pravy.
Sprava ŭ tym, što ad minułaha hodu MTS u svajoj reklamie vykarystoŭvaje nastupny hrafičny vobraz — biełaje jajka ŭ čyrvonym kvadracie i čyrvonaje jajka ŭ biełym kvadracie. Novy brend kampanii MTS źjaviŭsia ŭ traŭni 2006 h. Raspracavała jaho brytanskaja brendynhavaja ahiencyja Wolff Olins. Razanaŭ z Markaŭcom śćviardžali, što hety vobraz jašče ŭ 1992 hodzie prydumali jany i dali nazvu «jajkakvadraty».
Spadary Markaviec i Razanaŭ nastojvali na tym, kab kampanija MTS paprasiła ŭ ich prabačeńnie na staronkach hazet za vykarystańnie ichnaj intelektualnaj ułasnaści, a taksama kampensavać pa 620 tysiač rubloŭ kožnamu z tvorcaŭ. U svaju čarhu aperatar mabilnaj suviazi pradstaviŭ sudu dokazy taho, što jany karystajucca vyjavaj absalutna zakonna, bo majuć na heta dazvoł ad rasiejskaha ZAT «Systemy telekamunikacyj, infarmatyki i suviazi», jakoje zarehistravała hety tavarny znak jašče ŭ 2004 hodzie.
Praces doŭžyŭsia ad 27 žniŭnia. Tolki praz dva miesiacy sudździa Viarchoŭnaha sudu Koršun vynies kančatkovy vyrak pa hetaj spravie. Sud vyrašyŭ całkam adchilić pazoŭ Alesia Razanava i Viktara Markaŭca da kampanii MTS. Sudździa paličyŭ niedastatkovymi dovady pazoŭnikaŭ, što kampanija ŭžyvaje mienavita ichny tvor, chacia trochu i ŭ pieraroblenym vyhladzie. Taksama byli pradstaŭlenyja dokazy taho, što padobnyja hrafičnyja vyjavy ŭžyvalisia jašče da 1992 hodu, u tym liku ŭ tvorach Kazimiera Maleviča.
Rašeńnie Viarchoŭnaha sudu kančatkovaje i abskardžvańniu nie padlahaje.
Paet Aleś Razanaŭ adrazu pa vyniasieńni rašeńnia skazaŭ, što nie čakaŭ inšaha vyraku:
«My padali papiery ŭ centar intelektualnaj ułasnaści i tam jaje buduć razhladać. Jakoje b nie było rašeńnie sudu, jajkakvadraty ad hetaha nie prajhrajuć, bo jany ŭžo stali źjavaj kultury, mastactva, historyi. Z nami sud moža paspračacca, ale ź jajkakvadratami — nie. Nam važnym byŭ nie kančatkovy vynik, a sama źjava sudu, sama źjava razborak, zmahańnia, što padklučyłasia presa, što heta ahučvajecca».
 |
 |
 Viktar Markaviec i Aleś Razanaŭ |
