Voś zaraz usie zahavaryli: miakkim staŭleńniem da manifestantaŭ 14 kastryčnika Miensk zrabiŭ pasłańnie Bruselu. Navat dyskutujecca pytańnie, a ci nie skasuje zaraz Eŭraźviaz čorny śpis nievyjaznych čynoŭnikaŭ?
Padajecca, što nadta śpiašacca ŭ hetym pytańni Eŭraźviaz nia budzie. Vuń užo i tak vyklikała chvalu abureńnia ŭ pravaabaroncaŭ śviežaje rašeńnie datyčna ŭzbeckich čynoŭnikaŭ. Ci daŭno zmyvali kroŭ z asfaltu ŭ Andyžanie?
Što ž da pasłańnia aficyjnaha Miensku, to jano pajšło, badaj, u dva supraćlehłyja baki. Maskvie taksama padkidajecca padstava dla rozdumu. Voś, hladziecie, prazachodniaja apazycyja ŭžo volna špacyruje pa hałoŭnym praspekcie biełaruskaj stalicy! Jašče trochi — i Biełaruś pačnie drejf na Zachad.
My z vami, kaniešnie, viedajem stupień hetaha imitacyjnaha drejfu. Ale ŭ Maskvie pry najmienšaj nahodzie pačynajuć varušycca znajomyja fobii. Strata biełaruskaha placdarmu šmat kamu ŭ tamtejšych elitach ujaŭlajecca hieapalityčnaj katastrofaj. NATO pad Smalenskam i ŭsio takoje. Łabisty z hieneralitetu dy inšych słajoŭ adrazu pačynajuć naciskać: heta, maŭlaŭ, nia toj vypadak, kab hnacca za hazavym zvyšprybytkam i drać z chaŭruśnika try skury!
Tak što, schavaŭšy specnaz 14 kastryčnika, ułada vyrašyła strelić pijaraŭskim dupletam. Možna zhadać u hetym samym kantekście jašče i niadaŭniuju presavuju kanferencyju dla rasiejskich žurnalistaŭ. Pamiatajecie, jak tam malavaŭsia zmročny peryjad, kali nibyta panavali nacyjanalisty? Chaj viedajuć, što tolki ciapierašniaja ułada baronić Maskvu ad nataŭskich tankaŭ dy kryvažernych nacdemaŭ!
Praŭda, hetaja hulnia na dvuch kirunkach sama pa sabie nia novaja, ale kožny raz jość nadzieja spajmać svoj šaniec. U Rasiei zaraz elektaralnaja kampanija, Kramlu nia chočacca žarściaŭ u stasunkach ź "biełaruskimi bratami". Eŭrapiejskaja palityčnaja elita taksama nie manalitnaja. Tam jość "ćviarozyja hałovy", schilnyja da Realpolitik u stasunkach ź Biełaruśsiu. Ci nia z hetaj kahorty i sp. Ryhoni, što prylacieŭ zaraz u Miensk z ustanovy viadomaha nam van der Lindena?
