Kamitet dziaržkantrolu vyjaviŭ finansavuju niadbajnaść va ŭpraŭleńni kultury Homielskaha abłasnoha vykankama pry padrychtoŭcy da «Dažynak — 2007». U vyniku zakupki videaekrana dziaržava nie daličycca, jak minimum, kala 50 młn. rubloŭ.

Pavodle infarmacyi KDK pa Homielskaj vobłaści, napiaredadni respublikanskaha festu «Dažynki — 2007» upraŭleńnie kultury abłvykankama zaklučyła damovu z bresckim TAA «Huk i Śviatło Pro» na pastaŭku videaekrana koštam kala Br280 młn. biez praviadzieńnia tenderu. Pa damovie bresckaja arhanizacyja abaviazałasia pradastavić abstalavańnie da 1 kastryčnika 2007 hoda. To bok pry składańni damovy čynoŭniki nie ŭličyli terminy praviadzieńnia fiestyvalu, jaki, nahadajem, adbyŭsia 21‑22 vieraśnia. Pa zakančeńni śviata pracaŭnikoŭ vioski videaakran tak i nie byŭ pastaŭleny.

Anałahičnaja pradukcyja ajčynnaj vytvorčaści, darečy, kaštuje značna tańniej. Tak, na staličnych UP «Pałami» i «Haryzoncie» vyrablajuć videaekrany z padobnymi charaktarystykami za Br227 i 202 młn. adpaviedna.

Čynoŭniki z upraŭleńnia kultury abłvykankama admovilisia prakamientavać Racyi situacyju z zakupkaj videaekrana da festu «Dažynki — 2007», spasłaŭšysia na toje, što heta «ŭnutranaje pytańnie».

Mikoła Biańko, Radyjo Racyja

Клас
Панылы сорам
Ха-ха
Ого
Сумна
Абуральна