«My žyviom pa susiedstvie, tamu pavinny budavać z ukrainskim narodam prahmatyčnyja, blizkija, siabroŭskija adnosiny zaŭsiody», — zajaviŭ namieśnik ministra zamiežnych spraŭ Biełarusi Alaksandr Michnievič.
25 lutaha na infarmacyjnaj sustrečy sa studentami i vykładčykami Homielskaha dziaržaŭnaha ŭniviersiteta imia F.Skaryny.
Adkazvajučy na pytańni, jakija tyčacca apošnich padziej va Ukrainie i biełaruska-ŭkrainskich adnosin, Michnievič zapeŭniŭ, što niejkich śpiecyjalnych dyrektyŭ nakont tranślavańnia ŭkrainskaj temy ŭ MZS Biełarusi niama.
«Našy zajavy, jakija hučali ŭ apošni čas, byli skiravany na nastupnyja aśpiekty.
Pieršaje — nieŭmiašańnie va ŭnutranyja spravy Ukrainy. Druhoje — vyrašeńnie pytańniaŭ unutry Ukrainy tymi kanstytucyjnymi i zakonnymi mietadami, jakija prapisanyja. Treciaje — zaklik nie cisnuć zvonku na ŭkrainskija padziei, chaj sam ukrainski narod raźbiarecca. Čaćviorty aśpiekt, jaki nas tryvožyŭ i tryvožyć, — biaśpieka našych hramadzian.
I tut my žorstka zajaŭlali, što takich faktaŭ być nie pavinna, tym bolš u brackaj, siabroŭskaj, susiedskaj krainie. I my, jak lekary, kiravalisia praviłam «nie naškodź», — skazaŭ namieśnik kiraŭnika źniešniepalityčnaha viedamstva.
Michnievič zaklikaŭ udzielnikaŭ sustrečy sačyć za tym, jak budzie raźvivacca situacyja, i dać mahčymaść ludziam va Ukrainie samim razabracca, što ŭ ich adbyvajecca.
Jon taksama adznačyŭ, što novaja ŭłada va Ukrainie pakul farmirujecca.Kali zavieršycca praces farmiravańnia novaha ŭrada, abiaruć premjer-ministra, budzie abvieščana prahrama novaha ŭrada, tady MZS Biełarusi vystupić z zajavaj i vykaža svaju pazicyju i raspačnie adpaviednyja kroki, paviedamiŭ Michnievič.
«Hałoŭnaje — kab my praciahnuli aktyŭnaje ekanamičnaje ŭzajemadziejańnie, — padkreśliŭ jon. — U nas 7 miljardaŭ dalaraŭ byŭ tavarazvarot, ciapier jon krychu ŭpaŭ z-za kryzisu, ale dla nas heta kałasalny ekanamičny partnior.
U nas blizkaja mientalnaść, źmiašanyja siemji, u nas niama raździalalnych linij, a tolki plusy».
U adkaz na prapanovu pryniać «u jakaści družalubnaha kroku» na lačeńnie ŭ Biełaruś ludziej, jakija paciarpieli padčas sutyknieńniaŭ u Kijevie, Michnievič adkazaŭ: «Nie baču nijakich arhumientaŭ suprać hetaha padychodu, dziakuj za dobruju prapanovu. Paśla ŭzhadnieńnia hetaha pytańnia ź Ministerstvam achovy zdaroŭja nie baču nijakich pieraškod».
Novy ŭrad Ukrainy pavinna być sfarmavany 27 lutaha — takuju zadaču pastaviŭ siońnia pierad kiraŭnikami deputackich frakcyj i hrup v.a. prezidenta krainy, staršynia Viarchoŭnaj rady Alaksandr Turčynaŭ. Miarkujecca, što ŭ skład Kabinieta ministraŭ nie buduć uklučanyja aliharchi, a taksama kiraŭniki orhanaŭ vykanaŭčaj ułady i rabotniki administracyi prezidenta, jakija zajmali hetyja pasady ad pačatku 2010 hoda. U skład novaha ŭrada płanujecca ŭklučyć aktyvistaŭ Majdanu.
