Źbihnieŭ Bžazinski, viadomy amerykanski palitolah i były daradnik pa nacyjanalnaj biaśpiecy prezydenta Džymi Kartera, ličyć, što Zachad pavinien «uskładnić planavańnie Ŭładzimiru Pucinu» i pradstavić jamu na vybar niekalki šlachoŭ vychadu z ukrainskaha kryzysu.
Pra heta Źbihnieŭ Bžezinski havoryć u interviju internetnamu vydańniu The Huffington Post.
Miarkujučy pa apošnich pieramiaščeńniach vojska, Rasieja, mabyć, rychtujecca da zachopu Krymu. Što na heta ŭkraincy?
Bžazinski: Kali Rasieja tak zrobić, to, całkam mahčyma, jana atrymaje Krym, ale nazaŭždy stracić Ukrainu. Ukraincy nikoli hetaha Rasiei nie darujuć.
Što moža zrabić Zachad u bližejšym časie?
Bžazinski: Stratehija Zachadu ŭ dadzieny momant pavinna zaklučacca ŭ tym, kab ŭskładnić planavańnie Ŭładzimiru Pucinu. Jamu varta pradstavić varyjanty, jak paźbiehnuć kanfliktu. Ale jon taksama pavinien uśviedamlać sabie nehatyŭnyja nastupstvy dla Rasiei paśla taho, kali b jon pačaŭ zbrojny kanflikt.
Kažučy pra varyjanty, ja maju na ŭvazie toje, što my pavinny skazać Rasiei, što addajem pieravahu mirnamu vyrašeńniu kanfliktu va Ŭkrainie i što NATO pavinna zaprasić rasiejcaŭ da ŭdziełu ŭ svaich biahučych abmierkavańniach hetaha kryzysu.
Ale adnačasova my pavinny dać rasiejcam zrazumieć, što nie źbirajemsia być pasiŭnymi. Pa-pieršaje, my pavinny farmalna pryznać novy ŭrad va Ŭkrainie, jaki, na maju dumku, vykazvaje narodnuju volu. Heta lehitymny ŭrad. I ŭmiašańnie va ŭkrainskija spravy varta razhladać jak varožy akt zamiežnaj dziaržavy.
Akramia hetaha, my pavinny ŭvieści plan dziejańniaŭ NATO ŭ nadzvyčajnaj sytuacyi i razharnuć svaje siły ŭ Siaredniaj Eŭropie, kab adreahavać u vypadku vajny i jaje pašyreńnia.
Što źjaŭlajecca najlepšym rašeńniem dla Ŭkrainy, jakaja znachodzicca pamiž Zachadam i Rasiejaj?
Bžazinski: U kančatkovym vyniku najlepšym rašeńniem dla Ŭkrainy było b, kali b jana stała tym, čym Finlandyja była dla SSSR. Heta aznačała b adkrytyja ekanamičnyja adnosiny z Rasiejaj i pašyreńnie suviaziaŭ z Eŭraźviazam, ale admaŭleńnie ad udziełu ŭ lubych vajskovych sajuzach.
Kali nam udasca pieraadoleć hety kryzys i paźbiehnuć vajny, to ŭsio ž zastaniecca zmahańnie z ekanamičnym chaosam va Ŭkrainie. Džordž Soras zaklikaŭ Niamieččynu ŭziać na siabie inicyjatyvu ŭ akazańni dapamohi Ŭkrainie. I jakraz pierad pačatkam kryzysu va Ŭkrainie prezydent Niamieččyny Jaachim Haŭk zaklikaŭ svaju krainu, kab jana macniej prajaŭlała siabie na suśvietnaj arenie. Jakaja ŭ hetym moža być rola EZ u cełym i Niamieččyny ŭ pryvatnaści?
Bžazinski: Kali EZ surjozna stavicca da svajoj roli ŭ śviecie, jon pavinien pačać jakraz tut. A heta značyć, jon pavinien vykłaści hrošy, kab dapamahčy stabilizavać chistkuju ekanomiku Ŭkrainy. Kampramisnaje rašeńnie, jakoje budzie prymalnym dla Rasii i dla Zachadu, dazvolić paźbiehnuć vajny i daść ukraincam niejkuju nadzieju na budučyniu, uklučaje ŭ siabie surjoznuju ekanamičnuju dapamohu i investycyi. Pakolki Niamieččyna źjaŭlajecca najbolš zamožnaj i mocnaj ekanomikaj u EZ, jana pavinna ŭziać inicyjatyvu na siabie.
