Nabližajucca trecija ŭhodki teraktaŭ u Narviehii. Zamiest kłasičnaha pomnika narviežcy płanujuć «pierarezać» vostraŭ Utoja i na miescy trahiedyi stvaryć fijord.
Nietypovy pomnik sprajektavaŭ šviedski mastak Jonas Dalbierh. Prajekt praduhledžvaje adździaleńnie ad vostrava nievialikaha kavałku štučnym fijordam šyrynioj 70 mietraŭ, jaki maje simvalizavać rany. U skale buduć vybityja imiony achviaraŭ.
Ideja pomnika źjaviłasia, kali mastak byŭ na vostravie. «My stajali na tym samym miescy, dzie mnostva ludziej straciła žyćcio, i ja bačyŭ, što pryroda pačała ŭžo pacichu prychoŭvać ślady taho, što adbyłosia. Mnie zachaciełasia stvaryć niešta bolš tryvałaje, čym kłasičny pomnik, — niešta ŭ samoj pryrodzie», — tłumačyć Dalbierh.
***
22 lipienia 2011 h. u Narviehii Anders Brejvik ździejśniŭ dva terakty, padčas jakich zahinuła 77 čałaviek. Brejvik byŭ asudžany na 21 hod turmy z mahčymaściu praciahnieńnia pakarańnia.
