Kanfidencyjnyja ŭkazańni Janukoviča i nieafišavanyja kantakty z Rasijaj. Natatnik achoŭnika raskryvaje tajamnicy, jak biehły prezident pravioŭ apošnija tydni na pasadzie.
Hałasavańnie 16 studzienia stała pierałomnym momantam u padziejach Jeŭramajdanu. Paśla navahodnich i kaladnych śviataŭ połymia pratestu stała zhasać, a aktyvisty byli zaniatyja vyratavańniem svaich aŭtamabilaŭ ad padpałaŭ. Zdavałasia, što revalucyja sychodzić na nie. Ale rašeńnie Janukoviča luboj canoj pryniać «dyktatarskija zakony» źmianiła ŭvieś scenar — mirny pratest staŭ radykalnym.
Što prymusiła Janukoviča padlić aleju ŭ ahoń i pajści na novaje abvastreńnie z pratestoŭščykami, paśla jakoha jon užo nie adyšoŭ?
Jon vyrazna ruchaŭsia pa scenary Kramla, a šlachi jaho ŭciokaŭ prapracoŭvalisia jašče za niekalki miesiacaŭ da kryvavych padziej. U pieršaj dekadzie studzienia Janukovič pravioŭ tajemnuju sustreču z rasijskim prezidentam Uładzimiram Pucinym, u chodzie jakoj i byli vyznačanyja dziejańni ŭkrainskaj ułady, nakiravanyja na poŭnaje padaŭleńnie pratestu i adabreńnie represiŭnych zakonaŭ.
Heta vynikaje sa źmiestu natatnika kiraŭnika achovy Janukoviča, eks-supracoŭnika Hałoŭnaha ŭpraŭleńnia raźviedki Minabarony Kanstancina Kabzara, znojdzienaha ŭ rezidencyi «Mižhorje» daśledčykami ź inicyjatyvy «YanukovychLeaks».
«Ukrainskaja praŭda» publikuje źmiest dziońnika Kabzara, jaki adnosicca da padziejaŭ śniežnia 2013 - studzienia 2014, pierałomnych tydniaŭ va ŭkrainskaj historyi.
Na samaj spravie Kabzar byŭ nie tolki achoŭnikam, ale i refierentam Janukoviča. Jon staranna zapisvaŭ jaho ŭkazańni, a taksama zvanki ŭpłyvovych ludziej.
Pa daručeńni haspadara Kabzar navat atrymlivaŭ vielizarnyja hrošy, jakija pieradavalisia Janukoviču u jakaści chabaru. Viernaja słužba była vysoka acenienaja — jon prasovaŭ svajho słuhu pa słužbie. Na momant bałatavańnia Janukoviča ŭ prezidenty ŭ 2009 hodzie Kabzar byŭ lejtenantam, a ŭ dzień niezaležnaści 2013 jon atrymaŭ zvańnie hienierał-majora.
Tajemnaja sustreča Janukoviča z Pucinym adbyłasia 8 studzienia ŭ rezidencyi rasijskaha prezidenta na Vałdai. Pra heta śviedčać zapisy ŭ natatniku Kabzara.
Na levaj staroncy achoŭnik Janukoviča staranna pieraličvaje ludziej — vidavočna, heta farmujecca puł dla śviatkavańnia ź Janukovičam Novaha hoda abo Kaladaŭ.
«Artysty: Vajenha, Hazmanaŭ»
Dalej zapisanyja proźviščy zaprošanych asob:
Jakimaŭ +1
Hałavin +1
Aŭčarenka +1
NVER +2
Łaŭrynovič +1
Kułyniak
Maisiejeŭ +1
Prysiažniuk +1
Rasšyfroŭka: Jakimaŭ — heta pazyŭny hienprakurora Viktara Pšonki ŭ achovie Janukoviča, što paćviardžajecca hetaj transkrypcyjaj, znojdzienaj u Miežyhorji.
Hałavin — heta papiaredni kiraŭnik Kanstytucyjnaha suda Ukrainy. Sam rodam z Makiejeŭki; uznačalvaŭ KS u pieryjad kanstytucyjnaha buntu, kali Janukoviču byli viernutyja paŭnamoctvy Leanida Kučmy.
Aŭčarenka — apošni staršynia Kanstytucyjnaha suda, da pryznačeńnia ŭ KS byŭ staršynioj Jenakijeŭskaha suda, dzie mienavita tady była vyjaŭlena strata dakumientaŭ ab sudzimaści Janukoviča. Aŭčarenka — daŭni supolnik Janukoviča. U Mižhorji byli znojdzienyja dakumienty na pabudovu padkantrolnymi Janukoviču firmami doma dla Aŭčarenki.
NVER — hetaja asoba nie identyfikavanaja.
Łaŭrynovič — były ministr justycyi, ciapier — staršynia Vyšejšaha savieta justycyi.
Kułyniak — eks-ministr kultury, skrypač na pryvatnych mierapryjemstvach Janukoviča
Maisiejeŭ — nie identyfikavany
Prysiažniuk — ministr ahrarnaj palityki, jaki idzie ź Janukovičam poruč z časoŭ pracy na «Ardžanikidzevuhali» u 1980-ch hadach.
A ŭžo na susiedniaj staroncy kiraŭnik achovy Janukoviča praličvaje zručny maršrut pieralotu na Vałdaj, jaki jon u siłu svajoj niepiśmiennaści nazyvaje «Ałdaj».
Tak, kropkaj prylotu pakazany vajenny aeradrom Chaciłava ŭ Naŭharodskaj vobłaści.
Dalej — časovyja praliki maršrutu Hastomiel - Charkaŭ -Chaciłava; Žulany - Bransk -Chaciłava; Žulany - Danieck -Chaciłava.
Tut taksama staić paznaka «dasłać bort za nami» — vidavočna, prahavorvajecca varyjant pieralotu siłami avijacyi Pucina.
Vidavočna, sustreča na Vałdaje była pryśviečanaja pavodzinam Janukoviča va ŭmovach palityčnaha kryzisu. Heta stała canoj dalejšaj finansavaj padtrymki režymu Janukoviča za košt rasiejskaha biudžetu.
Prymusiŭšy Janukoviča ruchacca ŭ svaim farvatery antydemakratyčnych zakonaŭ, Pucin značna ŭskładniŭ jamu adnosiny z Zachadam, a taksama pakazaŭ niezadavolenym rasijskim apazicyjanieram, što jaho praktyki nabyvajuć novaje raspaŭsiudžvańnie.
Jak bačna, sustreča na Vałdai staranna rychtavałasia i pavinna była adbycca mienavita tam — kab nie pryciahvać lišniaj uvahi. Na inšaj staroncy kiraŭnik achovy Janukoviča piša:
«Piłotaŭ Falkone (pryvatny reaktyŭny samalot, administracyja prezidenta arandavała dla absłuhoŭvańnia Janukoviča ŭ jaho ž firmy «Centravija») prosiać prylacieć u Maskvu. Asablivaści aeradroma. Viarnucca ŭ hety ž dzień. Biez načoŭki. Prapanuje svoj bort, jość składanaści pry pasadcy».
Taksama ŭ hetyja dni achoŭnikam Janukoviča byli zroblenyja inšyja zapisy, jakija śviedčać pra kantakty prezidenta: «Miedźviadčuk prosić pavinšavać», «Hierman prosić ustalavać 200-ku (śpiecsuviaź) u kabiniet», «Ściažki pastaŭlenyja na ŭjezd Šustaru». Takim čynam, była paćvierdžanaja viersija pra zabaronu Šustaru ŭjazdžać na terytoryju Ukrainy.
Na inšaj staroncy natatnika Kabzar robić zaŭvahu: «Šustaru zakryć ŭjezd va Ukrainu. Jakimienka, SBU?» Vidavočna, što heta — zapisanaje im ukazańnie Janukoviča, jakoje treba było pieradać staršyni Słužby biaśpieki Jakimienku.
Na susiedniaj staroncy — adznaki. «Lebiedzieŭ — 08.01.14, Łaryn — 13.01.14. 02 — paśla 03.01.14 ».
Vidavočna, što heta — daty. Havorka idzie pra pryznačanyja sustrečach. Ministru abarony Lebiedzievu - na 8 studzienia, namieśniku kiraŭnika administracyi prezidenta Łarynu — na 13 studzienia. Pazyŭny «02» naležyć staršyni Viarchoŭnaj Rady Uładzimiru Rybaku. Jaho čakali adrazu paśla novaha hoda.
Pakazalnaja paznaka pobač na hetym ža razvarocie — «bramka, zaklejka telefon, biez ramki». Havorka idzie pra toje, što navat vysokapastaŭlenym haściam Janukoviča zalaplali kamiery na mabilnych telefonach.
«Centr FAK. 70, APK. Usie prachodziać praz centr FAK». Havorka idzie pra dostup u Mižhorje dla haściej — usie pavinny iści praz centralny ŭvachod Fizkulturna-azdaraŭlenčaha kompleksu. Navat ludzi, jakija paznačanyja šyframi «70» i «APK». APK rasšyfroŭvajecca jak «Andrej Piatrovič Klujeŭ». Chto taki «70», pakul ustanavić nie ŭdałosia.
Tut ža paznačana, što «ad 70-ha vino košyka» — havorycca pra navahodni padarunak Janukoviču.
«Susied pierahavaryŭ siońnia ź Simanienkaj — da adjezdu rychtuje ŭsialakuju duraść». Susied — heta pazyŭny Viktara Miedźviadčuka.
Nastupny zapis — niezadavolenaść Janukoviča adpačynkam ministra ŭnutranych spraŭ u razhar padziej na Majdanie: «Zacharčanka kab nie rabiŭ bolš tak, na adpačynak».
Na susiedniaj staroncy — niezadavolenaść Janukoviča publikacyjaj «Ukrainskaj praŭdy». Davodzicca navat padklučać hienprakurora Pšonku. Havorka idzie pra artykuł, dzie byli apublikavanyja pratakoły dopytaŭ eks-kiraŭnika KHHA Papova i eks-namieśnika sakratara Savieta biaśpieki Siŭkoviča adnosna padziej 30 listapada. Jak viadoma, tam byli pramyja pakazańni Papova pra dačynieńnie Andreja Klujeva da razhonu Jeŭramajdanu.
«Adkul na Ukrainskaj praŭdzie ŭsie dakumienty pa dopycie. Raźbiaryciesia i my pieratelefanujem. Pšonka, paśla 14:00. Patelefanavać», — zapisvaje achoŭnik Janukoviča jaho daručeńni.
Na druhoj staroncy — pieralik ludziej, jakija imknulisia patrapić da Janukoviča ŭ razhar kryzisu. Imiony kažuć sami za siabie:
Kurčanka prosić sustrečy
Surkis prosić sustrečy
Kaŭfman prosicca na dakład i pavinšavać z Novym hodam
Kurčanka — heta kasir siamji Janukoviča. Surkis — były prezident «Dynama» (Kijeŭ). Kaŭfman — adeski biznesmen, jakoha nazyvajuć kiraŭničym partnioram siamji Janukoviča ŭ aeraportach Baryspal, Adesa i Simfieropal, a taksama «Prezident-hateli».
Navinski na sustreču.
Surkis prosić pierahavaryć.
Navinski ŭ jaki čas
Jašče adna staronka. Iznoŭ «Kurčanka prosić sustreču». Dalej: «Demiškan važnaje pytańnie». Demiškan — były kiraŭnik Ukraŭtadora, adzin z zasnavalnikaŭ palaŭničaha kłuba «Kiedr», jaki ŭ intaresach Janukoviča uziaŭ u arendu palaŭničuju haspadarku «Suchałučča».
Niekalki razoŭ Janukoviča nabiraŭ «Jura Jenakijeŭski», kab paviedamić, što jon prybyŭ u krainu.
Ivaniuščanka ŭ Kijevie. Prasiŭ paviedamić.
Ivaniuščanka telefanavaŭ. Jon u Kijevie.
Kurčanka nastojliva sprabavaŭ patrapić da Janukoviča. U adnoj z natatak kiraŭnik achovy adznačaje, što pytańnie navat uzhodnienaje ź pieršym vice-premjeram Arbuzavym.
Kurčanka prosić sustrečy ŭ luby čas. Nieabchodna try hadziny i jon u nas. Pytańnie uzhodnienaje z Arbuzavym.
Pry hetym sam Arbuzaŭ jašče hod tamu kazaŭ, što «nie viedaje, što robić Kurčanka».
Cikava, što na hetaj ža staroncy paznačanaje proźvišča deputata ad partyi «Svaboda» Juryja Bublika. Pryčym u dvuch miescach. Sam nardep skazaŭ, što prykładna ŭ hetyja dni byŭ pad Mižhorjem razam z pamočnikami i zdymaŭ videa pra rezidencyju.
Nastupnaja staronka — uciečka z pasiadžeńnia Savieta Jeŭramajdanu. Chtości dałažyŭ achoŭniku Janukoviča, pra što išła havorka na sustrečy.
Pasiadžeńnie kamiteta Jeŭramajdanu ŭ budynku Fiederacyi prafsajuzaŭ. Razhladałasia pytańnie, jak pryhoža i płaŭna skončyć ź Jeŭramajdanam. Pieršaja prapanova 2-ch-3-ch dzionnaja akcyja, prachod šmattysiačnym natoŭpam.
Nastupny zapis — «Jakimavu pierahavaryć z 19-m pa mietrapalitenie dyrektaru». Tut ža paznačana proźvišča kiraŭnika kijeŭskaha mietro — Uładzimir Fiedarenka.
«Jakimaŭ» — hienprakuror Pšonka. Vidavočna, hetaja razmova była taksama vyklikanaja Majdanam — u natatniku zafiksavanyja padziei śniežnia-studzienia, tady ž pačalisia pieršyja zakryćci stancyj mietro ŭ centry z metaj niedapuščeńnia novych pratestoŭcaŭ na Majdan.
Asobny raździeł u natatkach achoŭnika Janukoviča — heta kolkaść bajcoŭ śpiecpadraździaleńniaŭ, pryciahnutych da achovy «Mižhorja». Lik vymiarajecca siamju sotniami! Byli pryciahnutyja dva bronietransparciory.
Akramia tajemnych sustreč Janukoviča i jaho scenaryjaŭ padaŭleńnia demakratyi, natatnik Kabzara źmiaščaje jašče adnu zahadku — pra kantakty Janukoviča z Rasii.
Na hetaj staroncy rasijski numar i tolki imia i imia pa baćku — «Jaŭhien Viktaravič». Mahčyma, havorka idzie pra namieśnika staršyni Savieta Fiederacyi Rasii Jaŭhiena Viktaraviča Bušmina, jaki pradstaŭlaje ŭ sienacie Rastoŭskuju vobłaść. Miesca, kudy ŭciok Janukovič, ratujučysia ad trybunału za zabojstva ŭłasnych hramadzian.
Adnačasova čałaviek, jaki biare trubku pa hetym numary, śćviardžaje, što «adbyłasia pamyłka». «Mianie nie kličuć Jaŭhien Viktaravič», — havoryć hołas i kidaje trubku.
A nadpis sprava ŭtrymlivaje raźlik śpiecpadraździaleńniaŭ, pryciahnutych da achovy Mižhorja. Infarmacyja moža šakavać supracoŭnikaŭ śpiecsłužbaŭ. Na pabiahuškach u «załatoha ŭnitaza» było navat Hałoŭnaje ŭpraŭleńnie raźviedki Ministerstva abarony, jakoje pavinna źbirać vajennyja sakrety za miežami terytoryi Ukrainy. Heta — čarhovaje, ale, viadoma, nie hałoŭnaje parušeńnie zakona režymam Janukoviča.
