Na dumku ekśpierta, Pucin siońnia nie zdolny da dyjałohu, a Zachad i Rasija skočvajucca ŭ novuju chałodnuju vajnu, jakaja moža praciahnucca 10 hadoŭ.
— Prafiesar Šnajder, prezident Rasii Uładzimir Pucin padpisaŭ damovu ab uklučeńni Kryma i Sievastopala ŭ skład Rasii ŭ jakaści novych subjektaŭ fiederacyi. Jakoje ŭražańnie zrabiła na vas jaho pramova, što hetamu papiaredničała?
— Ja adznačyŭ, jak časta jon spasyłaŭsia na Zachad, na ZŠA. Dla jaho heta vidavočna mierka. Jon zajmaŭsia zvyčajnym dla jaho padtasoŭvańniem faktaŭ. Pieraličyŭ, što rabili ZŠA ŭ jakich krainach. Arhumientacyja dziŭnaja. Kali ŭžo ty ŭpikaješ ZŠA ŭ parušeńniach mižnarodnaha prava, to z hetaha nie vynikaje vysnova: što im dazvolena, to nam užo i pahatoŭ.
A potym jon pačaŭ vykazvać razumieńnie i spačuvańnie Majdanu. Vykazaŭsia suprać, ja b skazaŭ, režymu Janukoviča, što naskroź prakraŭsia, ale ni słovam nie zhadaŭ pieršapačatkovy šturšok da źjaŭleńnia Majdana — admovu Janukoviča padpisać damovu ab asacyjacyi ź ES. Pucin nie pryvioŭ nivodnaha dokazu drennaha abychodžańnia z rasijcami ŭ Krymie, što apraŭdała b rasijskaje ŭmiašańnie. Jon naŭprost zajaviŭ, što Rasija budzie zaŭsiody abaraniać intaresy rasijcaŭ va Ukrainie. Što jon mieŭ na ŭvazie? Pahrozu praciahu interviencyi va Uschodniaj Ukrainie?
— Ale davajcie pahladzim na samu praceduru pryniaćcia rašeńniaŭ. Spačatku Duma i Saviet Fiederacyi pavinnyja zaćvierdzić pryniaćcie Kryma ŭ skład Rasii. Ale raptam Pucin ustaje i kaža: «Ja prezident, ja pryniaŭ rašeńnie, ja rasparadžajusia jaho zaćvierdzić». Heta što za demakratyja?
— Pa-pieršaje, dziejnaja Kanstytucyja Rasii zabaraniaje prymać u skład Rasii rehijony, raźmieščanyja ŭ miežach inšaj dziaržavy. Heta značyć, urad Ukrainy, Viarchoŭnaja rada pavinnyja dać zhodu. Kijeŭ, naturalna, takoj zhody nie davaŭ. Tak što jany padrychtavali prajekt zakona i navat pradstavili jaho Vieniecyjanskaj kamisii. Kamisija jaho adprečyła. Tady jaho zaćvierdzili ŭ aŭralnym paradku.
— Prezident ZŠA Abama i kancler Hiermanii Mierkiel biez kanca nazvońvajuć Pucinu. Nijakija arhumienty na jaho, miarkujučy pa ŭsim, nie dziejničajuć. Naadvarot, jon siabie pazicyjanuje jak abaronca demakratyi ad dvudušnaści Zachadu, što robić staŭku na hrubuju siłu. Što takaja pazicyja abiacaje nam u budučyni?
— Ja asabista liču, što Pucin u dadzieny momant nie zdolny da dyjałohu. Usie hetyja zvanki jamu ničoha nie daduć. Andrej Iłaryjonaŭ, pa-mojmu, maje racyju, kali kaža, što Pucin u dadzieny momant absalutna hłuchi. U jaho histaryčnaja misija: źbirańnie ziemlaŭ savieckich. U Anhieły Mierkiel ža taksama skłałasia ŭražańnie, što Pucin adarvany ad realnaści.
— Rasijskaja prapahanda pakazvaje dziejańni Rasii ŭ Krymie jak pieramohu nad ukrainskimi nacyjanalistami i fašystami. Pierachodnaha ŭrada ŭ Kijevie Maskva nie pryznaje. Pucin u svajoj pramovie kazaŭ pra antysiemitaŭ i nacystaŭ, jakich kuryruje Zachad. Nakolki niebiaśpiečnaja takaja słoŭnaja eskałacyja?
— Ja ŭžo čuć usio heta nie mahu. Na hetym pabudavanaja ŭsia rasijskaja prapahanda.
Hladzicie, «Pravy siektar» va Ukrainie — heta 0,2%, Usieŭkrainskaje abjadnańnie «Svaboda» — ad siły 2%. I navat ad antysiemickich vykazvańniaŭ niekatorych asobaŭ «Svaboda» daŭno adchryściłasia. Tut rasijskija ŚMI vybudoŭvajuć vobraz voraha. Ale ja chacieŭ by zakranuć jašče adzin važny momant. Kali b dla Pucina havorka išła tolki pra Krym, možna było b abhavaryć prablemy z uradam u Kijevie. Možna było pravieści refierendum miesiacy praz dva, kab była sumlennaja pieradvybarnaja baraćba. Nielha ž ładzić refierendum pad aŭtamatami. Usio možna było abstalavać inakš. Ale nie, Pucina cikaviŭ nie stolki Krym. Jon chacieŭ pakazać kułak Zachadu. Jon uspryniaŭ pieramohu Majdana i źviaržeńnie Janukoviča jak asabistuju abrazu.
Całkam mahčyma, što žychary Kryma i ŭ narmalnych umovach vykazalisia b na karyść Rasii. Ale Pucin — heta ja pačuŭ u jaho pramovie — adčuvaje siabie asabista prynižanym: maŭlaŭ, vy na Zachadzie mianie ŭsurjoz nie ŭsprymajecie, vy robicie što chočacie.
— Anieksija Kryma, prapahanda na dziaržaŭnym telebačańni, kułak Zachadu — usim hetym Pucin padniaŭ chvalu ŭra-patryjatyčnych nastrojaŭ u samoj Rasii. Ci atrymajecca jaje pahasić? Abo patrebnyja novyja kroki, kab rejtynh Pucina nie padaŭ? Chto nastupny — Uschodniaja i Paŭdniovaja Ukraina, Uschodni i Paŭnočny Kazachstan?
— Nie tolki heta. Pucinu vidavočna patrebien vobraz voraha praz unutranyja prablemy ŭ Rasii. Ekanamičny rost u najbližejšyja hady składzie, pavodle prahnozaŭ, ad 1,6 da 2,1%. A kab finansavać prahramu ŭzbrajeńniaŭ, patrebna minimum 6-7%. Pa sučasnych technałohijach Kitaj daŭno abahnaŭ Rasiju.
Pucinu patrebien vobraz voraha, kab tłumačyć nasielnictvu: heta ŭsio sankcyi Zachadu, ja ničoha nie mahu zrabić.
Nasamreč situacyja takaja, jak u časy chałodnaj vajny. Dzie nastupny etap? Ja b skazaŭ, dałučeńnie Paŭdniovaj Asiecii. Śledam — Abchazija. Potym — Prydniastroŭje. Samy piakučaje pytańnie — što stanie z Uschodniaj Ukrainaj.
— Prafiesar Šnajder, vy ŭžo adkazali na hetaje pytańnie. Tym nie mienš — nam tolki pahražaje novaja chałodnaja vajna ci jana ŭžo pačałasia?
— Ja liču, što my ŭ jaje skočvajemsia. I pradoŭžycca jana moža 10 hadoŭ, pakul Pucin zastaniecca na pasadzie prezidenta. Jon nie zdolny da dyjałohu. Mnie zdajecca, jon navat hatovy mirycca z tym, što jaho kurs nanosić škodu samoj Rasii. Jamu ŭsio roŭna.
