Ad Hienprakuratury Biełarusi patrabujuć zabaranić tranślacyju ŭ krainie telekanała RTR. Podpisy pad adpaviednym zvarotam byli sabranyja 19 sakavika padčas pieršaha pasiadžeńnia ŭ Minsku inicyjatyvy Kamiteta salidarnaści z Ukrainaj.
Jak paviedamiła aktyvistka Hanna Šapućka, zvarot budzie adpraŭleny poštaj. U dakumiencie zaznačajecca, što patrabavańnie zabaranić u Biełarusi viaščańnie telekanała Rasija 1 (RTR) vyklikana tym, što ŭ pieradačach hetaha kanała «Viesti» i «Voskriesnyj viečier s Sołovjevym» u vystupleńniach viadučych i haściej prahram hučać zakliki da nacyjanalnaj varožaści.
Aprača taho, havorycca ŭ zvarocie, stavicca pad sumnieńnie prava biełaruskaha naroda na samavyznačeńnie, hučać zakliki da źmieny kanstytucyjnaha ładu Biełarusi, adviarhajecca jaje suvierenitet.
U zvarocie ŭtrymlivajecca patrabavańnie zabaranić ujezd u Biełaruś i raspačać spravu pa artykule 130 Kryminalnaha kodeksa ŭ dačynieńni da televiadučych Dźmitryja Kisialova i Uładzimira Sałaŭjova, a taksama haściej ich prahram Alaksandra Prachanava, Uładzimira Žyrynoŭskaha, Anatola Vasiermana i Alaksandra Duhina.
