Urad Rasii razhladaje prajekt pastanovy, jakaja zabaronić rasijskim dziaržaŭnym miedycynskim ustanovam nabyvać miedyčnyja tavary, vyrablenyja za miežami Rasii, Biełarusi ci Kazachstana. Taksama prapanujecca zabaranić nabyvać tavary miedycynskaha pryznačeńnia, u jakich dola impartnych składnikaŭ bolšaja za 50%.
U dakumiencie paznačana, što padobnyja zachady nakiravanyja na «abaronu ŭnutranaha rynku Rasijskaj Fiederacyi».
Pieralik tavaraŭ, što padpadajuć pad abaronu, vielmi šyroki. U jaho ŭvachodziać jak survetki, roby i šprycy, tak i składanaja miedtechnika: tamohrafy, aparaty renthienahrafii i abstalavańnie dla reanimacyi.
Vierahodna, takim čynam Rasija adkazvaje na mahčymyja i ŭžo ŭviedzienyja sankcyi Zachadu.
Varta adznačyć, što rasijskija ŭłady ŭžo nieadnarazova vykazvali hatoŭnaść achviaravać zdaroŭjem i dabrabytam ułasnych hramadzian dziela «simietryčnaha adkazu» na sankcyi. Tak, u 2012 hodzie Rasija zabaraniła ZŠA usynaŭlać rasijskich dziaciej. Aficyjna heta tłumačyłasia śmierciu pryjomnanaha dziciaci Dzimy Jakaŭleva ŭ amierykanskaj siamji. Adnak mnohija ličać zakon adkazam na «Śpis Mahnickaha», pa jakim mnohim vysokim rasijskim čynoŭnikam byŭ zabaronieny ŭjezd u ZŠA.
