Biez adzinaha kandydata apazicyi na prezidenckich vybarach 2015 hoda niama čaho rabić, miarkuje lider kampanii «Havary praŭdu», kandydat u prezidenty Biełarusi na vybarach 2010 hoda, były palitźniavoleny Uładzimir Niaklajeŭ.
«My vystupajem za toje, kab raspracavać miechanizm i vyznačycca z adzinym kandydatam, i ja zaŭsiody z hetaj pazicyjaj vystupaŭ, — zaznačyŭ jon. — Kali hladzieć siońnia, to biez hetaha na vybarach 2015 hoda apazicyi niama čaho rabić. Ale jak heta zrabić? Ja ŭžo prosta šaleju ad taho, što ŭ nas u apazicyi adbyvajecca».
Pavodle słoŭ Niaklajeva, časta ŭ apazicyi «nibyta zajaŭlajuć adno, ale zatym z-za niejkich pryčyn sprabujuć saskočyć, kab być jak by čystymi». «Kali navat u drobiaziach, damaŭlajučysia, my parušajem hetyja damoŭlenaści, to pra što možna havaryć surjozna? Tym bolš, majučy vopyt 2010 hoda. Ja tady kazaŭ: kali my razam nie budziem dziejničać va ŭsich sumiesnych akcyjach, to ničoha nie dasiahniem i ŭ hałoŭnym. Tak, na žal, i adbyłosia», — skazaŭ palityk.
Niaklajeŭ nie bačyć sensu ŭ vyłučeńni niekalkich apazicyjnych kandydataŭ u prezidenty. Jon paviedamiŭ, što prapanoŭvaŭ svoj varyjant vychadu na adzinaha kandydata: kali pradstaŭniki kampanii «Narodny refierendum» i kaalicyi «Tałaka» vyznačajucca sa svaimi kandydatami, a zatym vyrašajecca, chto ź ich budzie adzinym.
«Ja dahetul nie razumieju, čamu hetaja prapanova nie była pryniataja. Nichto nie zajaviŭ, što zhodny być adzinym kandydatam. Znoŭ pačałosia: my nie viedajem, heta nie asabistaje rašeńnie, heta rašeńnie struktury, partyi i hetak dalej. A čas, miž inšym, padciskaje.
Užo viasna, miascovyja vybary, chacia raniej stavili zadaču vyznačycca z adzinym kandydatam jakraz da daty miascovych vybaraŭ», — zaŭvažyŭ lider «Havary praŭdu».
Nahadajem, inicyjatary kampanii «Narodny refierendum» («Havary praŭdu», Partyja BNF i ruch «Za Svabodu») prapanavali pravieści kanhres demakratyčnych sił Biełarusi dla vybrańnia adzinaha kandydata ŭ prezidenty, a sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec zajaŭlaŭ ab nieabchodnaści praviadzieńnia kanhresa ŭžo hetaj viasnoj.
Niaklajeŭ miarkuje, što arhanizavać kanhres demsił možna za miesiac. «Ale mnie kažuć pra toje, jaki heta składany miechanizm, jakija heta moža prynieści prablemy apazicyi, što toj, chto prajhraje, nie pahodzicca sa svaim paražeńniem. Ale z takimi padychodami lepš naohuł nijakuju surjoznuju spravu nie pačynać», — upeŭnieny palityk.
Pry hetym lider «Havary praŭdu», jaki ŭžo zajaviŭ pra svoj namier bałatavacca na pasadu prezidenta, padkreśliŭ: kali adzinym kandydatam ad demsił vybieruć nie jaho, jon hatovy admovicca ad svaich płanaŭ.
