U 29-m numary «Dziejasłova» nadrukavany ŭspaminy Leaniły Bortnik — žonki kiraŭnika antysavieckaj arhanizacyi Hieorhija Bortnika, siabroŭki SBM, jakaja dvojčy prajšła praź piekła HUŁAHu. Jana zhadvaje, što naradziłasia ŭ siamji psałomščyka ŭ vioscy Kasuta na Vialejščynie, i što vioski hetaj «užo niama na mapie, jana źniesienaja ź ziamli».
Nasamreč vioska Kasuta paznačanaja na mapie Vialejščyny i staić na toj ziamli. U joj navat zachavałasia carkva Śviatych Apostałaŭ Piatra i Paŭła — muraŭjoŭka 1868 h., u jakoj, vidać, i słužyŭ baćka spadaryni Leaniły — A.V.Baradzin.
Cikava, što ŭ hetaj carkvie byŭ achryščany jašče adzin zmahar z savietčynaj — Raścisłaŭ Łapicki, pra los jakoha raspavioŭ niadaŭna ŭ svaich knižkach Michaś Čarniaŭski.
Vioska Kasuta jość miescam naradžeńnia Pilipa Orlika ź biełaruskaha šlachieckaha rodu Navina, ukrainskaha dziaržaŭnaha dziejača, paplečnika Maziepy, paśla śmierci jakoha byŭ abvieščany hietmanam.
Tak i prosicca Kasuta važnym punktam u patryjatyčnuju vandroŭku z umoŭnym nazovam «Zmahary i pakutniki», u maršrut jakoj možna ŭłučyć Vialejku ź jaje sumnaviadomaj turmoj, Servač — radavoje hniazdo Koziełaŭ, aktyŭnych udzielnikaŭ paŭstańnia 1863—64, Kuraniec z Uładykami, dzie zachavalisia mahiły tych paŭstancaŭ, Illu — u navakolli jakoj na pačatku 50‑ch zmahaŭsia Filistovič.
