 A-r Kvaśnieŭski |
Tut pačałasia mižnarodnaja kanferencyja, pryśviečanaja planavanym na vosień 2008 hodu vybaram u pałatu pradstaŭnikoŭ. Z takoj prapanovaj vystupiŭ były ministar zamiežnych spravaŭ Litvy, ciapier namieśnik staršyni parlamenckaha kamitetu ŭ eŭrapiejskich spravach Antanas Valonis. Na jahonuju dumku, hrupu daśviedčanych i aŭtarytetnych palitykaŭ moh by ŭznačalić były prezydent Polščy Alaksandar Kvaśnieŭski.
Sustaršynia Palitrady abjadnanych demakratyčnych siłaŭ Biełarusi Siarhiej Kalakin havoryć, što jaho kalehi padtrymlivajuć prapanovu litoŭskaha eks‑ministra:
«Heta ŭžo nia tolki inicyjatyva. Praces užo faktyčna pačaŭsia. I takaja hrupa budzie stvoranaja. Hałoŭnaje — jość intares da Biełarusi ŭ ludziej, jakija majuć vialiki dośvied palityčnaj pracy na vielmi‑vielmi vysokim uzroŭni. Tamu, ja dumaju, budzie niakiepska, kali jany papracujuć i znojduć niejkija novyja padychody, kab dapamahčy stanaŭleńniu demakratyi ŭ Biełarusi. Ja dumaju, heta realnaja sprava».
Jašče adzin sustaršynia Palitrady Anatol Labiedźka adznačaje, što prapanova spadara Valonisa nie admaŭlaje inšaj inicyjatyvy — pravieści specyjalnuju mižnarodnuju kanferencyju ŭ spravach Biełarusi. Jana moža zychodzić ad Eŭraźviazu.
Navošta patrebnaja takaja kanferencyja, tłumačyć spadar Labiedźka:
«Pačać realny pieramoŭny praces u Biełarusi. Nie razmovy pra dyjaloh, jaki raściahnuty ŭ prastory j nie abmiežavany časam — a ŭvosień pad ehidaj Eŭraźviazu dy inšych mižnarodnych arhanizacyjaŭ z udziełam uładnych strukturaŭ i abjadnanaj demakratyčnaj apazycyi pačać realny pieramoŭny praces pra vybary, a nia ichnuju imitacyju ŭ Biełarusi. Paśla kanferencyi možna było b stvaryć rabočuju hrupu, jakaja b padrychtavała źmieny ŭ vybarčaje zakanadaŭstva. Ich pryniali b uvosień. I zastavaŭsia b amal hod na padrychtoŭku i praviadzieńnie vybarčaj kampanii. Adzinaja ŭmova, na naš pohlad, — vyzvaleńnie palitviaźniaŭ. Tamu što najaŭnaść ludziej, jakija siadziać u turmach za svaje palityčnyja pohlady, — heta vielmi drennaje tło dla praviadzieńnia takoha mierapryjemstva. Tut šmat pradstaŭnikoŭ ambasadaŭ. I reakcyja ŭdzielnikaŭ kanferencyi pazytyŭnaja».
Zaŭtra kanferencyja praciahniecca. Inicyjavali jaje kala dziasiatka palityčnych partyjaŭ Biełarusi, Litvy j Švecyi. Arhanizavali forum Švedzki liberalny centar i litoŭskaje hramadzkaje abjadnańnie «Daśledavańnie medyjaŭ i infarmacyjny centar».
