Siabra Partyi rehijonaŭ Hanna Hierman miarkuje, što niama nijakaj nieabchodnaści pravodzić refierendum, da jakoha zaklikaje adchileny prezident Ukrainy Viktar Janukovič.
Pra heta jana zajaviła «Radyjo Vieści», kamientujučy zvarot ad imia Viktara Janukoviča, raspaŭsiudžany ŭ rasijskich ŚMI, pieradaje pres-słužba PR.
«Ja chaču nahadać Viktaru Fiodaraviču, što ŭsie rehijony i tak u składzie Ukrainy, i ja nie razumieju, navošta nam refierendum. U nas niama ni nieabchodnaści, ni mahčymaści marnavać hrošy na refierendumy.
Ukraina — biednaja kraina, i Viktar Fiodaravič viedaje, čamu», — skazała palityk.
«Ja dumaju, što Viktar Fiodaravič, napeŭna, vielmi chacieŭ skazać dziakuj svaim paplečnikam za šmathadovuju sumiesnuju pracu. Jon chacieŭ paprasić prabačeńnia ŭ svaich kalehaŭ za toje, što pakinuŭ nas i nie skazaŭ, jak nam być i što rabić dalej», — dadała Hierman.
«Ja spadziajusia, što ludzi, jakija byli šarahovymi členami partyi i ščyra vieryli ŭ toje, što im kazali, zrobiać pravilnuju vysnovu. A z nahody prośby vyjści z šerahaŭ partyi, to źjezd napeŭna pahodzicca z hetym», — zajaviła Hierman.
Jana taksama prakamientavała słovy Janukoviča pra toje, što jon dušoj i ŭ dumkach z ukraincami. «Ja ŭspomniła rycarski deviz: «Duša — Bohu, honar — dziaržavie». Jaho možna pierafrazavać u hetym vypadku tak: «Duša — Bohu, hrošy — dziaržavie», — skazała Hierman.
«Kali b Viktar Fiodaravič moh u hetym dapamahčy Ukrainie, tady možna było b pahavaryć i pra dušu», — skazała Hierman.
