Muziej Jakuba Kołasa.
Naprykancy minułaha hoda Ministerstva kultury pryniało rašeńnie źnizić status Litaraturnaha muzieja Maksima Bahdanoviča
i rearhanizavać jaho ŭ filijał Dziaržmuzieja historyi biełaruskaj litaratury. Tyja ž źmieny čakali Litaraturny muziej Pietrusia Broŭki. Niadaŭna adbyłosia ich abjadnańnie.
U Ministerstva kultury isnavaŭ i bolš ambicyjozny prajekt. Čynoŭniki płanavali stvaryć Nacyjanalny muziej historyi biełaruskaj litaratury, u jaki płanavałasia abjadnać staličnyja litaraturnyja muziei (u tym liku Janki Kupały i Jakuba Kołasa).
Dźmitryj Šlachcin, namieśnik načalnika ŭpraŭleńnia ŭstanoŭ kultury i narodnaj tvorčaści, tłumačyŭ, što status nacyjanalnaha muzieja dazvolić uźniać status filijałaŭ i pavialičyć zarobki supracoŭnikaŭ. Bo taki status praduhledžvaje inšy kaeficent dla naličeńnia zarobku. Ale padkreśliŭ, što rašeńnie kančatkova nie pryniataje.
Urešcie ad abjadnańnia było vyrašana admovicca. U intervju kananu ONT ministr kultury Barys Śviatłoŭ zajaviŭ: «Kožny płan – heta taki pryblizny prajekt, jaki nie abaviazkova pavinien ažyćciavicca na samoj spravie.
Siońnia i muziej Janki Kupały, jaki isnuje z 1944 hoda, i muziej Jakuba Kołasa, jaki isnuje z 1956 hoda, jany ŭžo nastolki raźvilisia, nastolki ŭžo nabyli vysoki, samastojny ŭzrovień, što kali ich abjadnoŭvać i dałučać da jakoha-niebudź treciaha subjekta haspadarańnia, heta pryviadzie tolki da paharšeńnia ich dziejnaści. Tamu jany zastajucca samastojnymi».
