Taryfy na pasłuhi ŭ ramkach Mytnaha sajuza pavinny być vyraŭnavany. Pra heta zajaviŭ kiraŭnik Fiederalnaj antymanapolnaj słužby Rasii Ihar Arciemjeŭ pa vynikach praviedzienaj siońnia ŭ Maskvie sustrečy kiraŭnikoŭ antymanapolnych orhanaŭ MS i ministra pa kankurencyi i antymanapolnym rehulavańni Jeŭrazijskaj ekanamičnaj kamisii Nurłana Ałdabierhienava.
U pryvatnaści, pa słovach Ihara Arciemjeva, na sustrečy abmiarkoŭvalisia pytańni čyhunačnych pieravozak, avijacyi i roŭminhu. Na jaho dumku, roŭminh u MS naohuł treba admianić, jak heta było zroblena ŭ Jeŭrasajuzie, a taksama likvidavać tak zvany mižnarodny taryf. «Heta budzie spryjać, viadoma, i pašyreńniu kankurencyi, i naohuł ŭzajemnamu praniknieńniu našych ekanomik», — padkreśliŭ jon.
Taksama Ihar Arciemjeŭ adznačyŭ «dziŭnyja rečy ź pieratokam i prodažam elektraenierhii praź miažu». Časam adna kraina pradaje tavar inšaj daražej u piać razoŭ, čym u svaich miežach, i ad hetaj dyspraporcyi nieabchodna pazbaŭlacca, miarkuje jon.
Akramia taho, kiraŭnik FAS Rasii asobna vyłučyŭ nieabchodnaść vyrašeńnia pytańnia zavyšanych koštaŭ na leki na rynkach krain-členaŭ MS.
«Ciapier zroblenyja pieršyja analizy rynkaŭ, dakłady. Ličby, viadoma, nas mocna ździvili ŭ tym sensie, što dyspraporcyja vializnaja. I my zaraz budziem heta ŭsio vypraŭlać», — skazaŭ Ihar Arciemjeŭ.
Pavodle jaho słoŭ, pa ŭsich vyjaŭlenych prablemach kožny antymanapolny orhan budzie dziejničać ŭnutry svajoj krainy. Akramia taho, JEEK padrychtuje dakumienty pa hetych pytańniach niepasredna kiraŭnikam Biełarusi, Rasii i Kazachstana.
