Zamiest pahroz Alaksandru Łukašenku było b lepš pravieści svabodnyja vybary. Takuju dumku vykazaŭ lidar kampanii «Havary praŭdu» eks-kandydat u prezidenty Biełarusi Uładzimir Niaklajeŭ, kamientujučy siońniašniuju zajavu kiraŭnika dziaržavy.
Vystupajučy z pasłańniem da naroda i parłamienta, Łukašenka ŭ pryvatnaści papiaredziŭ, što luby zaklik da pieravarotu budzie žorstka źniščany ŭ zarodku. «Usiaki, chto zaklikaje da buntu, — heta vorah nie tolki ŭłady, prezidenta, heta ŭ pieršuju čarhu vorah našaj krainy, našaha naroda, heta vorah adzinstva našaha, a značyć, i niezaležnaści Biełarusi», — zajaviŭ Łukašenka.
Niaklajeŭ u svaju čarhu zaznačyŭ: «Revalucyja ŭźnikaje abo nie ŭźnikaje niezaležna ad lubych pahroz. Kali stvarajucca ŭnutranyja ŭmovy dla revalucyi, jana nie hladzić ni na jakija pahrozy». Na dumku palityka, biełaruskaja Płošča pa sutnaści adroźnivajecca ad ukrainskaha Majdana. «Kab nie było vystupleńniaŭ na Płoščy, Łukašenku dastatkova zrabić prostuju reč, pra jakuju jon siońnia čamuści nie kaža: jamu treba pravieści spraviadlivyja vybary. I tady nie treba nikoha pałochać, nie treba budzie nikoha bajacca», — dadaŭ Niaklajeŭ.
Na dumku namieśnika lidara ruchu «Za Svabodu» Juryja Hubareviča, zajava Łukašenki adrasavanaja nie tolki apazicyi, ale i aktyŭnaj častcy hramadstva — «pradprymalnikam, ludziam biudžetnaj śfiery, tym, chto niezadavoleny svaim žabrackim stanoviščam u Biełarusi».
Jašče adnym adrasatam pasłańnia, miarkuje Hubarevič, źjaŭlajucca «patencyjalna prarasijskija siły»: «Nie vypadkova Łukašenka na pieršym etapie svajho pasłańnia pryśviaciŭ uvahu pytańniam niezaležnaści Biełarusi. Dumaju, byŭ jasny pasył, što jon razhladaje siabie adzinym harantam niezaležnaści, što jon zrobić usio mahčymaje, kab nie paŭtarylisia padziei kštałtu ŭschodnieŭkrainskich. Tamu jon zahadzia papiaredžvaje mahčymych «zialonych čałaviečkaŭ», aktyvistaŭ prarasijskich struktur, što staŭleńnie da ich dziejańniaŭ budzie žorstkaje».
Na dumku palitołaha Juryja Čavusava, takimi vykazvańniami za hod da prezidenckich vybaraŭ Łukašenka sprabuje mabilizavać svaich vybarščykaŭ. Aprača taho, miarkuje palitołah, takim čynam Łukašenka daŭ zrazumieć, što budzie i dalej kantralavać situacyju ŭ krainie.
