Dziaržduma Rasii ŭstanaviła kryminalnuju adkaznaść za reabilitacyju nacyzmu. Adpaviedny zakonaprajekt pryniaty siońnia nižniaj pałataj adrazu ŭ druhim i trecim čytańniach.
Maksimalnaje pakarańnie pa artykule «Reabilitacyja nacyzmu», jakoj dapoŭnieny rasijski Kryminalny kodeks, ustanoŭlena ŭ vyhladzie štrafu ŭ pamiery 500 tys. rasijskich rubloŭ albo pazbaŭleńniem voli na termin da piaci hadoŭ.
Novy artykuł KK abviaščaje: «Admaŭleńnie faktaŭ, ustanoŭlenych prysudam Mižnarodnaha vajennaha trybunała dla suda i pakarańnia hałoŭnych vajennych złačyncaŭ jeŭrapiejskich krain vosi, adabreńnie złačynstvaŭ, ustanoŭlenych ukazanym prysudam, a roŭna raspaŭsiud zaviedama iłžyvych źviestak ab dziejnaści SSSR padčas Druhoj suśvietnaj vajny, złučanych z abvinavačvańniem ŭ ździajśnieńni złačynstvaŭ, ustanoŭlenych ukazanym prysudam, učynienyja publična, karajucca štrafam u pamiery da 300 tys. rubloŭ albo pazbaŭleńniem voli na termin da troch hadoŭ».
Bolš žorstkija sankcyi ŭstaloŭvajucca za tyja ž dziejańni, učynienyja asobaj z vykarystańniem słužbovaha stanovišča ci ŚMI, «a roŭna sa štučnym stvareńniem dokazaŭ abvinavačvańnia». Za heta ustaloŭvajecca štraf ad 100 tys. da 500 tys. rubloŭ, jak alternatyva — pazbaŭleńnie voli na termin da piaci hadoŭ z pazbaŭleńniem prava zajmać peŭnyja pasady abo zajmacca peŭnaj dziejnaściu na termin da troch hadoŭ.
Uvodzicca kryminalnaja adkaznaść da piaci hadoŭ pazbaŭleńnia voli za apahańvańnie dzion vajskovaj słavy i pamiatnych dat Rasii, źviazanych ź Vialikaj Ajčynnaj vajnoj.
