 |
Nahadajem, namieśnik staršyni abłasnoj maładziožnaj krajaznaŭčaj arhanizacyi «Tałaka» i namieśnik staršyni abłasnoj arhanizacyi maładziožnaha kryła Partyi BNF «Moładź BNF» Z.Žaleźničenka byŭ adličany z VNU 7 vieraśnia. Jon źjaŭlaŭsia vydatnikam vučoby i za apošni čas dva siemiestry nie mieŭ propuskaŭ zaniatkaŭ biez pavažnych pryčyn.
Padstavaj dla adličeńnia administracyja VNU nazvała sistematyčnaje parušeńnie praviłaŭ unutranaha rasparadku univiersiteta. U dakładnoj zapiscy rektaru dekan matematyčnaha fakulteta Siarhiej Žohal ukazaŭ na vyhavar, jaki atrymaŭ Z.Žaleźničenka ŭ listapadzie 2006 hoda za admovu dać tłumačeńni ŭ suviazi z prapuščanymi zaniatkami. Taksama matyvam dla adličeńnia dekan nazvaŭ rašeńnie haspadarčaha suda Homielskaj vobłaści ab pryciahnieńni da administracyjnaj adkaznaści Z.Žaleźničenki za niezakonnuju pradprymalnickuju dziejnaść. Aktyvist byŭ adnym z arhanizataraŭ kancerta biełaruskich bardaŭ 23 červienia ŭ Homieli — rasklejvaŭ afišy i pradaŭ niekalkich uvachodnych biletaŭ. Haspadarčy sud paličyŭ heta administracyjnym pravaparušeńniem.
U skarzie ŭ sud Z.Žaleźničenka ŭkazaŭ, što vyhavar — heta dyscyplinarnaje spahnańnie, a rašeńnie haspadarčaha suda — administracyjnaje, tamu jany nie źjaŭlajucca sistemaj. Tasama aktyvist ukazvaje na toj fakt, što niezakonnaja pradprymalnickaja dziejnaść, u adpaviednaści z KoAP, nie źjaŭlajecca pravaparušeńniem, što zamachvajecca na hramadski paradak.
«Tym bolš, na momant majho adličeńnia rašeńnie haspadarčaha suda ab pryciahnieńni mianie da adkaznaści nie nabyło zakonnuju moc, bo ja jaho abskardziŭ u Vyšejšym haspadarčym sudzie. A administracyja VNU navat nie pacikaviłasia, ci nabyło moc rašeńnie. Naohuł biurakratyčnaja mašyna našaj dziaržavy zdolnaja pracavać z roznaj chutkaściu — ad imhniennaj da vielmi marudnaj. Rašeńnie haspadarčaha suda pryjšło va univiersitet 3 vieraśnia, nazaŭtra dekan užo napisaŭ dakładnuju rektaru, praź dzień prajšło pasiadžeńnie prafkama, i praz dva dni mianie adličyli. A skarhu, nakiravanuju ŭ Minadukcyi, tam čytali 32 dni, a zatym mnie adkazali, što «vas adličyli». Biez razboru, jak i za što», — zaznačyŭ Z.Žaleźničenka.
U chodzie sudovych pasiadžeńniaŭ dekan matematyčnaha fakulteta S.Žohal pryznaŭ, što jon «krychu niapravilna kvalifikavaŭ administracyjnaje pravaparušeńnie Žaleźničenki», ale śćviardžaŭ, što student byŭ adličany pravamierna.
