U Niaśvižy 9 maja za antyvajennuju akcyju była zatrymana aktyvistka arhkamiteta pa stvareńni partyi «Biełaruskaja chryścijanskaja demakratyja» ź Niaśviža Natalla Bordak, paviedamlaje pres-słužba arhanizacyi.
Pra svajo zatrymańnie jana skazała ŭ sms-paviedamleńni svajmu znajomamu Alaksandru Jaźvinskamu. «Ja va ŭčastku za płakat «Nie pucinskaj vajnie z Ukrainaj», — napisała jana.
Telefon Bordak nie adkazvaje, jaje miescaznachodžańnie nieviadomaje. Jaźvinski miarkuje, što aktyvistka zastaniecca pad vartaj da paniadziełka, kali jaje, mahčyma, čakaje sud.
Napiaredadni adkryćcia i padčas čempijanatu śvietu pa chakiei ŭ Biełarusi prajšli masavyja advolnyja zatrymańni i aryšty hramadskich aktyvistaŭ. Pavodle zajavy pravaabaroncaŭ, ich zatrymlivajuć vyklučna pa sfabrykavanych i adnatypnych abvinavačańniach «Drobnaje chulihanstva», «Niepadparadkavańnie supracoŭnikam milicyi». Usiaho zatrymana ci aryštavana ŭžo kala 30 čałaviek, niekatorych aktyvistaŭ apazicyi milicyja praciahvaje vyšukvać.
