Hrupa biełaruskich rasracoŭščykaŭ mabilnych pryłažeńniaŭ Flaxtreme raspracavała novy hid pa Minsku dla pryładaŭ na płatformie Android i iOS. Prahrama atrymała nazvu Go Minsk i jaje možna biaspłatna skačać z Google Play i App Store.
Hałoŭnaje mieniu prahramy.
Go Minsk dastupny pa-biełarusku, pa-anhlijsku i pa-rasijsku, a interfiejs nadzvyčaj prosty i zrazumieły. U pryłažeńni možna znajści śpis kramaŭ, baraŭ i restaranaŭ, načnych kłubaŭ z karotkim apisańniem, «pryviazany» da servisu Google Maps: Go Minsk aŭtamatyčna pakaža znachodžańnie abjekta na karcie Minska i adlehłaść da jaho.
Ekskursii pa Minsku.
Adnak adroźnivaje pryłažeńnie ad užo najaŭnych mabilnych minskich daviednikaŭ najaŭnaść kulturnickaj častki. Akramia handlovych centraŭ i abjektaŭ hramadskaha charčavańnia Go Minsk utrymlivaje vialiki śpis muziejaŭ, halerej, architekturnych i histaryčnych słavutaściaŭ.
Tak vyhladaje ekskursija na karcie.
Pryčym akcent robicca i na najnoŭšaj historyi Biełarusi: razam z Nacyjanalnym mastackim muziejem i Nacyjanalnaj biblijatekaj u śpis uvajšoŭ KDB, CIPP na Akreścina, płošča Banhałor razam z tłumačeńniem roli kožnaha miesca ŭ žyćci biełarusaŭ.
Go Minsk moža nie tolki pakazać cikavostki Minska, ale i prapanuje hatovyja tematyčnyja ekskursii. Na dadzieny momant pryłažeńnie ŭtrymlivaje 9 padarožžaŭ praciahłaściu ad 2,5 da 3 hadzin.
Układka «Słavutaści».
Siarod ich «mastacki špacyr» pa muziejach i halerejach, «duchoŭny špacyr», «eka špacyr», «zialony špacyr» — pramienad pa staličnych parkach i skvierach.
Adnak jość i bolš niezvyčajnyja prapanovy. Tak, ekskursija «Chroniki supracivu» raskazyvaje historyju pratestnaha ruchu 2006 i 2010 hadoŭ, «plušavaha desantu» i sudoŭ nad aktyvistami.
Cełaja ekskursija pryśviečana lubimym miescam seks-mienšaściaŭ: z «ŁHBT-špacyra» možna daviedacca, što źviazvaje kafe «Sajuz-Anłajn», łaźniu №1 i Michajłaŭski skvier z hiej-tusoŭkaj Minska.
Top samych vyrodlivych budynkaŭ horada pieratvorany ŭ ekskursiju «Sapsavany Minsk», a Aleh Trusaŭ padrychtavaŭ «Moŭny špacyr» pa biełaruskamoŭnym Minsku.
Karotkaje apisańnie Minska.
U pryłažeńni jość i niedarečnaści: błytanina z nazvami — razam źmiešanyja biełaruskaja łacinka, tranśliteracyja pa savieckim uzory i prosta «pierakładzienyja» nazvy, niekatoryja karcinki nie zahružajucca, časam sustrakajucca miescy-pryvidy biez nazvaŭ i apisańnia, adlehłaść da niekatorych kropak ukazvajecca niapravilna. Adnak Go Minsk moža zacikavić nie tolki turystaŭ, ale i samich minčukoŭ, bo dazvalaje adkryć dla siabie novyja miescy ci zirnuć na ŭžo znajomyja ź inšaha rakursu.
