 |
Uračystaść raspačniecca a 11‑j u archikatedralnym sabory imia Najśviaciejšaj Panny Maryi, što na płoščy Svabody. Na cyrymoniju zaprošanyja hości ź Biełarusi, Italii, Litvy, Polščy, Rasiei, pra heta paviedamiŭ «NN» a. Alaksandar Amialčenia, adkazny za ŚMI pry sakrataryjacie Kanferencyi katalickich biskupaŭ u Biełarusi. Pryniać udzieł u joj zaprošanyja pradstaŭniki miascovaj ułady, vierniki, pradstaŭniki roznych kanfesijaŭ.
«Čakajecca vialikaja kolkaść žadajučych prysutničać na cyrymonii, ale katedra, na vialiki žal,nia zdolnaja ŭmiaścić usich. Tamu na vulicy budzie ŭstalavany admysłovy ekran» — raspavioŭ a. Amialčenia.
Padčas ŭračystaści mitrapalit Mienska‑Mahiloŭski archibiskup T.Kandrusievič adsłužyć liturhiju dy pračytaje propaviedź. Budzie začytany Ŭkaz Papy Rymskaha Benedykta ChVI ab pryznačeńni archibiskupa T.Kandrusieviča na pasadu mitrapalita.
8 listapada a 11‑j u pamiaškańni kuryi Mienska‑Mahiloŭskaj archidyjacezii (h. Miensk, vuł. Revalucyjnaja, 1a) adbudziecca pres‑kanferencyja z udziełam arcybiskupa Mitrapalita Mienska‑Mahiloŭskaha Tadevuša Kandrusieviča. Na joj siarod inšych buduć zakranutyja taksama pytańni cyrymonii 10 listapada.
***
Tadevuš Kandrusievič naradziŭsia ŭ 1946 h. u Adelsku na Haradzienščynie. Skončyŭ Leninhradzki politechničny instytut. 31 traŭnia 1981 h., pa skančeńni Kovienskaj duchoŭnaj seminaryi, rukapakładzieny ŭ śviatary. Abaraniŭ doktarskuju dysertacyju «Samaśviadomaść Carkvy» pavodle dakumentaŭ II Vatykanskaha saboru.
Z 1988 h. u Biełarusi. 10 traŭnia 1989 h. pryznačany Apostalskim Pasadam biskupam dla Mienskaj dyjacezii. U krasaviku 1991 h. pryznačany Apostalskim administrataram dla katalikoŭ łacinskaha abradu poŭnačy Eŭrapiejskaj častki Rasiei. U sakaviku 1999 h. vybrany Staršyniom Kanferencyi katalickich biskupaŭ Rasiei, a ŭ lutym 2002 pryznačany Papam Janam Paŭłam II mitrapalitam novastvoranych rymska‑katalickich japarchij Rasiei.
