 Ven Cziabao |
Svaim vizytam u Biełaruś premjer-ministar KNR Ven Cziabao paćvierdziŭ fakt isnavańnia pamiž Pekinam i Mienskam asablivych adnosinaŭ. «Mienskamu tyranu» terminova spatrebilisia srodki dla isnavańnia jaho kulhavaj planavaj ekanomiki, bo tanny rasiejski haz moža skončycca ŭ luby momant, piša Neue Zürcher Zeitung.
Dalej u artykule viadziecca pra padpisańnie kitajskim premjeram i Ŭładzimieram Siamaškam šerahu pahadnieńniaŭ ab supracoŭnictvie ŭ sfery ekanomiki i kultury. Pry hetym vice-premjera U. Siamašku NNZ uparta nazyvaje premjer-ministram krainy. Staršynia ŭradu Siarhiej Sidorski ŭ hety dzień byŭ u Karei.
Pavodle vydańnia, u časie sustrečy z Ven Cziabao Łukašenka vykazaŭ słovy padziaki pekinskamu režymu za jaho palityčnuju, ekanamičnuju i dyplamatyčnuju padtrymku.
Ciopły pryjom kitajskaha kiraŭnika ŭ Miensku švejcarskaja hazeta tłumačyć adsutnaściu siabroŭ u Łukašenki nia tolki na Zachadzie, ale i ŭ Rasiei. Mienavita ŭ Kitaja Łukašenka navučyŭsia žorstka dušyć navat samyja słabyja apazycyjnyja chvalavańni, dziakujučy čamu ŭ Biełarusi i nie adbyłasia «kalarovaja» revalucyja, piša NZZ.
Siarod padarunkaŭ, što pryvioz z saboju ŭ Biełaruś Ven Cziabao, švejcarskaje vydańnie vyłučaje damovu pra vydzialeńnie biełaruskamu boku pakupnickaha kredytu ŭ abjomie $500 młn. na zakupku troch linijaŭ pa vytvorčaści cementu. Padkreślivajecca, što abjom ŭzajemnaha handlovaha tavarazvarotu ŭ minułym hodzie ŭpieršyniu pieravysiŭ adznaku ŭ $1 młrd. Zadavalnieńnie Pekina vyklikaje pavažlivaje staŭleńnie Miensku da palityki «adzinaha Kitaju», to bok adsutnaściu pamiž Biełaruśsiu i Tajvaniem dyplamatyčnych stasunkaŭ.
Nie pakinuła pa-za ŭvahaj Neue Zürcher Zeitung i toj fakt, što kiraŭnik kitajskaha ŭradu nie naviedaŭ «kanhres marksistaŭ», što akurat u hety čas źjechalisia z usiaho śvietu ŭ biełaruskuju stalicu. A taksama nahadała, što kiraŭnik Padniabiesnaj nijakim čynam nie prakamentavaŭ antysemickija vykazvańni Łukašenki nakont Babrujsku, jakija vyklikali šyroki rozhałas pa ŭsim śviecie.
Biełaruś i Kitaj mohuć adčuvać uzajemasuviaź i z toj pryčyny, što parušeńnie pravoŭ čałavieku ŭ abiedźviuch krainach vielmi redka sutykajucca z pratestami z boku zachodnich palitykaŭ. U vypadku z Kitajem vierch biare biznes, jaki stavicca vyšej za maralnyja pryncypy. A Biełaruś uvažajecca za sferu ŭpłyvu i farpost Rasiei, z čym nia moža nie ličycca Eŭropa.
