U Biełarusi pavialičvajucca taryfy na pasłuhi elektrasuviazi, jakija akazvajucca fizičnym asobam, jurydyčnym asobam i indyvidualnym pradprymalnikam. Adpaviednaje rašeńnie Ministerstva ekanomiki № 39 ad 22 maja 2014 hoda apublikavana 23 maja na Nacyjanalnym pravavym internet-partale i nabudzie moc praź piać dzion.
Štomiesiačnaja abaniemientnaja płata dla fizičnych asob za pieraviedzieny na pačasovuju apłatu telefon pavialičana na 20% da 12.250 rubloŭ.
Pahadzinnaja płata za kožnuju poŭnuju ci niapoŭnuju chvilinu złučeńnia vyrasła da 29,8 rubloŭ (na 9%). Abaniemientnaja płata za nie pieraviedzieny na pahadzinnuju apłatu hutarak telefon budzie składać 17 400 rubloŭ (na 20% bolš). Chvilina mižharodnich telefonnych złučeńniaŭ u stacyjanarnaj sietcy biez dapamohi telefanista składzie 72,6 rubla (na 10% bolš).
Dla jurydyčnych asob štomiesiačnaja abaniemientnaja płata pavyšana na 17% da 15.500 rubloŭ za pieraviedzieny i 29.350 za nie pieraviedzieny na pačasovuju apłatu telefon. Pačasovaja płata za kožnuju poŭnuju ci niapoŭnuju chvilinu złučeńnia pavialičana na 16% da 51 rubla. Chvilina mižharodnich telefonnych złučeńniaŭ składzie 83 rubli (na 10,6% bolš).
Jak prakamientavali ŭ Minekanomiki, pavyšeńnie praduhledžana z metaj paetapnaj likvidacyi stratnaści ŭnutryrespublikanskich pasłuh elektrasuviazi ahulnaha karystańnia.
Pry hetym zastalisia bieź źmieny jak dla nasielnictva, tak i dla jurydyčnych asob i indyvidualnych pradprymalnikaŭ taryfy na pasłuhi pa davańni dostupu da miascovaj telefonnaj sietki z vykarystańniem kancavoj abanienckaj pryłady (telefona), da sietki internet u punktach kalektyŭnaha karystańnia i pasłuhi miascovych telefonnych złučeńniaŭ z vykarystańniem taksafona.
Papiaredniaje pavieličeńnie taryfaŭ na pasłuhi telefonnaj suviazi adbyłosia 19 sakavika.
