Futbolnyja fanaty ŭ Italii, niezadavolenyja zabojstvam zaŭzatara «Łacyjo» palicejskimi, učynili masavyja zabureńni ŭ roznych častkach krainy.
Palicyja zajaviła, što 26‑hadovy dydžej z Rymu Habryele Sandry byŭ zastreleny z‑za «trahičnaj pamyłki» pamylicyjantaŭ, jakija sprabavali raźniać fanataŭ «Łacyjo» j «Juventusa» na aŭtaservisie ŭ Taksanie.
Hrupa zaŭziataraŭ «Łacyjo», jakaja jechała na matč ź miłanskim «Interam», sustrełasia ŭ hetym miescy z hrupaj fanataŭ «Juventusa», jakija kiravalisia ŭ Parmu. Sandry, jak paviedamlajecca, zastrelili ŭ mašynie pobač z restaranam.
Pavodle źviestak palicyi, palicyjant trapiŭ u maładziona, kali zrabiŭ papieradžalny streł, ale padrabiaznaści zdareńnia daloka nia jasnyja. Viadziecca raśśledavańnie.
Najvialikašaha razmachu zabureńni dasiahnuli ŭ Rymie. Uzbrojenyja fanaty napali na palicejskija kazarmy j štab‑kvateru Nacyjanalnaha alimpijskaha kamitetu.
Achoŭniki NAKu zabarykadavalisia źsiaredziny, a zvonku tym časam chulihany bili šyby j palili mašyny.
Taksama natoŭp fanataŭ pierakryŭ adzin z mastoŭ cieraz raku Tybar z adnaho bierahu j nie prapuskaŭ kiroŭcaŭ.
Zaplanavany na kaniec dnia matč na rymskim «Stadyjo Alimpika» miž klubami «Roma» i «Kaljary» byŭ adkładzieny ź mierkavańniaŭ biaśpieki, ale natoŭp fanataŭ z kamianiami j dubinkami sabraŭsia j tam.
Hetaksama paviedamlajecca, što ŭ Rymie chulihany spalili aŭtobus. U sutyknieńniach paciarpieli dziasiatki palicyjantaŭ.
U centry Milana sutyknieńni palicyi j fanataŭ adbylisia la budynku dziaržaŭnaj teleradyjokampanii RAI.
U Berhama, dzie klub «Milan» hulaŭ z kamandaj «Atalanta», matč byŭ spynieny praź 10 chvilin paśla pačatku, bo fanaty sprabavali prarvacca na pole.
Na stadyjonie ŭ Sijenie zaŭziatary kryčali palicyjantam «zabojcy». Siem matčaŭ vyšejšaj lihi pačalisia na 10 chvilin paźniej i prajšli ŭ davoli napiataj atmasfery. Hulcy na hetych matčach vyjšli na pole z čornaj paviazkaj na ruce.
Premjer‑ministar Italii Ramana Prodzi zaklikaŭ pravieści starannaje raśśledavańnie abstavin zabojstva Habryele Sandry j zajaviŭ, što ŭsplosk hvatłu «vyklikaje niepakoj».
Pavodle słovaŭ Vinčenca Džakobe, načalnika palicyi Areca, dzie adbyŭsia incydent, palicyjanty, nie razabralisia, što pierad imi fanaty.
Nahadajem, sioleta ŭ lutym u časie chvalavańniaŭ fanataŭ na Sycylii byŭ zabity palicyjant.