33 krainy ŭnieśli na Hieneralnaj asamblei AAN prajekt rezalucyi, jakaja asudžaje Biełaruś za parušeńnie pravoŭ čałavieka.
Aŭtary dakumentu vyražajuć «hłybokuju zaniepakojenaść z nahody praciahu vykarystańnia systemy kryminalnaha pravasudździa dla taho, kab prymusić zamaŭčać palityčnuju apazycyju j pravaabaroncaŭ, u tym liku ŭ formie samavolnaha zatrymańnia, nievykanańnia naležnych pracesualnych normaŭ i začynienych palityčnych sudovych pracesaŭ nad viadučymi pradstaŭnikami apazycyi j pravaabaroncami».
U prajekcie rezalucyi havorycca pra «dalejšuju eroziju demakratyčnaha pracesu» j śćviardžajecca, što miascovyja vybary ŭ Biełarusi ŭ 2007 hodzie prajšli z vykarystańniem metadaŭ zapužvańnia apazycyi j ucisku niezaležnych ŚMI.
Aŭtary prajektu, siarod jakich ZŠA, krainy Eŭraźviazu j Japonija, nahadali Miensku pra hvałtoŭnaje źniknieńnie troch palityčnych apanentaŭ prezydenta krainy Alaksandra Łukašenki ŭ 1999 hodzie j žurnalista ŭ 2000 hodzie.
U vinu Biełarusi pastaŭleny ŭcisk i zakryćcio niaŭradavych arhanizacyj, arhanizacyj nacyjanalnych mianšyniaŭ, niezaležnych srodkaŭ masavaj infarmacyi, relihijnych hrup, apazycyjnych palityčnych partyj, niezaležnych prafsajuzaŭ i studenckich arhanizacyj. U śpisie «pieraśledavanych uładami» fihuruje Eŭrapiejski humanitarny ŭniversytet.
Letaś Hieneralnaja asambleja pryniała rezalucyju, jakaja asudžała Miensk za parušeńnie demakratyčnych svabodaŭ. Rasieja hałasavała «suprać».