 Cimoch Vostrykaŭ |
«Cimoch Vostrykaŭ vielmi mužna trymaŭsia va ŭmovach źniavoleńnia. U łahiery hrupa biełaruskaj moładzi hurtavałasia vakoł jaho. Jon byŭ ščyrym biełarusam, jaki ŭłasnym prykładam davodziŭ ideju słužeńnia svajoj krainie. Ź jaho śmierciu 13 listapada Biełaruś straciła sapraŭdanaha zmahara za niezaležnaść i svabodu», — uspaminaŭ pra siabra Sabiła.
Paśla śviatar začytaŭ uryŭki ź Jevanhiella, a taksama raźvitalnuju malitvu.
Cimocha Vostrykava pachavali na viaskovych mohiłkach u Ramanavičach, jakija znachodziacca na ŭzhorku nad rakoj Ipuć. Svajaki i aktyvisty demakratyčnaha ruchu Homiela aharnuli trunu niabožčyka bieł‑čyrvona‑biełym ściaham i ŭskłali kvietki da mahiły.
Pra svajo znajomstva ź Cimocham Vostrykavym raspavioŭ pieršy staršynia krajaznaŭčaj arhanizacyi «Tałaka» i homielskaha BNF Aleś Jaŭsiejenka.
‑ U pieryjad «šuškievickaj adlihi» nam udałosia znajści ŭ archivach źviestki pra žyvych śviedkaŭ antysavieckaha supracivu, siarod jakich nie apošnim čałaviekam byŭ Cimoch Vostrykaŭ. U pačatku 90‑ch, padčas adnaho sa śviatkavańniaŭ 25 sakavika, ja ŭpieršyniu ŭbačyŭ užo niemaładoha Vostrykava. Pry znajomstvie jon tak mnie ścisnuŭ ruku, što ja adčuŭ siabie chłopčykam, chacia sam zajmaŭsia sportam. Jak vyjaviłasia, Cimoch Vostrykaŭ surjozna zajmaŭsia džyŭ‑džytsu i ciažkaj atletykaj. Jahonyja fizičnyja dadzienyja dapamahali pieranieści žachi źniavoleńnia ŭ kancłahierach, u jakich jon pravioŭ 22 hady. Z raspoviedaŭ Vostrykava vynikała, što ŭ viaźnicach jon supraciŭlaŭsia paradkam kryminalnych aŭtarytetaŭ, jakija chacieli padparadkavać sabie palityčnych. Adnaho razu Vostrykaŭ prosta złamaŭ ruku adnamu z kryminalnych lideraŭ, kali toj chacieŭ jaho zarezać.
Darečy, napiaredadni śmierci Cimocha Vostrykava pa ANT paŭtorna prajšoŭ dakumientalny film Ksienii Bacharavaj «Rezident dźviuch raźviedak», pryśviečany dziejnaści «špijonskaj hrupy «Čaćvierka».
Paŭnamocny pradstaŭnik Rady BNR Cimoch Vostrykaŭ vysadziŭsia z parašutam u Biełarusi ŭ vieraśni 1952 hoda, ale nieŭzabavie byŭ aryštavany. Ciaham nastupnych 22 hadoŭ jon pravioŭ u balšavickich viaźnicach. U 1975 hodzie byŭ vyzvaleny i viarnuŭsia na Radzimu. Da skonu Vostrykaŭ žyŭ u Homieli.
