Nazirajučy tradycyjny siužet «dobry car — kiepskija bajary», ci ŭsie zaŭvažyli, što Prakapovič pramaŭlaŭ jak sapraŭdny refarmatar? U pryvatnaści, zaklikaŭ zrabić u nas samyja liberalnyja ŭ śviecie ŭmovy dla investycyjaŭ i biznesu ŭvohule. Biezumoŭna, jon nie advažyŭsia b na takija pramovy biez admaški. Piša Alaksandar Kłaskoŭski.
Uščent skrytykavany marksizm usio ž maje racyjanalnaje ziernie. Ja — pra bazys i nadbudovu. Jak zachistałasia ekanomika, ułada chucieńka zharnuła sacyjalistyčnuju rytoryku, adabrała lhoty — i pakrysie dumaje pra reformy, bajučysia samoha hetaha słova.
Kamentatary družna adznačyli, što narada ŭ aŭtorak prajšła, jak toj kaža, u lepšych tradycyjach. "SB" navat nazvała jaje "biesprecedentna rezkaj". Va ŭsiakim razie, takoha pračuchancu ministram nie davali daŭno.
Ale heta pijaraŭski składnik. Treba pakazać, što prezydent chvareje dušoj za narod i viedaje, "chto vinavaty".
Druhoje ž klasyčnaje pytańnie — "što rabić?". Dyk voś, nazirajučy tradycyjny siužet "dobry car — kiepskija bajary", ci ŭsie zaŭvažyli, što Prakapovič pramaŭlaŭ jak sapraŭdny refarmatar? U pryvatnaści, naŭprost zaklikaŭ zrabić u nas samyja liberalnyja ŭ śviecie ŭmovy dla investycyjaŭ i biznesu ŭvohule. A ci daŭno viałosia pra "vašyvych błochaŭ"?
Biezumoŭna, kiraŭnik Nacbanku nie advažyŭsia b na takija pramovy biez "admaški". Jahonaja ŭstanova siońnia vyhladaje samaj niezaležnaj dy racyjanalnaj instytucyjaj finansava-ekanamičnaha bloku. Mahčyma, u asobie Prakapoviča pramaŭlaŭ nastupny premjer (hetuju versyju padchapiła ŭžo rasiejskaja presa). Ciapierašniamu ŭradu dadzieny hod. Dzivosaŭ, badaj, nia budzie, i novaja kamanda atrymaje mahčymaść ładzić ekanamičnuju palityku z čystaha arkuša.
Praces užo spakvala pajšoŭ. Kryva, kaniešnie, zyhzahami, ale pajšoŭ. Navat nieprazrystaja pryvatyzacyja pašyraje ŭpłyŭ zamiežnaha kapitału. Čym bolšaj budzie ŭdzielnaja vaha pryvatnaha biznesu, tym ciažej stanie machać puhaj. Transfarmacyi bazysu zmusiać da revizii zvykłaha dyryžysckaha arsenału. Sam Łukašenka ŭ aŭtorak pryznaŭ: "Peryjad, kali ekanomikaj kiravali ŭ ručnym režymie, skončyŭsia".
Ekanamičnyja imperatyvy zdolnyja zrabić nieparaŭnalna bolej, čym sacyjalnyja maršy dy asudžalnyja rezalucyi zachodnich instytucyjaŭ. Hlabalizacyja (nu kudy padziecca ad SHA?) kapaje pad "biełaruskuju madel", jak toj krot. Škada voś stračanaha histaryčnaha času. Dy i na paśladoŭnuju, rašučuju stratehiju reformaŭ spadziavacca nie vypadaje. Čašu doŭhaha, nastalhičnaha raźvitańnia z "polem cudaŭ" ciarplivamu elektaratu daviadziecca vypić da dna.
