 Karen Stewart |
Pasłu ZŠA ŭ Biełarusi Karen Ściuart uručana nota pratestu ŭ suviazi z sankcyjami, uviedzienymi Minfinam ZŠA ŭ dačynieńni da kancerna «Biełnaftachim». Pra heta 15 listapada paviedamiŭ žurnalistam pres‑sakratar biełaruskaha MZS Andrej Papoŭ.
Pavodle jaho słoŭ, notu pieradaŭ 15 listapada namieśnik ministra zamiežnych spraŭ Biełarusi Viktar Hajsionak. U dakumiencie zaznačana, što zhadanaje rašeńnie ZŠA parušaje dvuchbakovyja damoŭlenaści, a taksama normy mižnarodnaha prava. Biełaruski bok patrabuje ad ZŠA viarnuć aryštavanyja aktyvy ich uładalniku — «Biełnaftachimu» — i źniać usie abmiežavańni, a taksama zdymaje ź siabie adkaznaść za nastupstvy, jakija moža paciahnuć hetaje rašeńnie ZŠA ŭ stasunkach pamiž subjektami haspadarańnia dźviuch krain.
Nahadajem, 13 listapada Ministerstva finansaŭ ZŠA zamaroziła ŭsie bankaŭskija rachunki «Biełnaftachima», što znachodziacca pad jurysdykcyjaj ZŠA i jaho pradstaŭnictvaŭ u Hiermanii, Łatvii, Ukrainie, Rasii i Kitai, a taksama rachunki daččynaj amierykanskaj kampanii «Biełnaftachim Ju‑Es‑Ej». Aprača taho, amierykanskim biźniesmienam pradpisana ŭstrymacca ad kantaktaŭ z hetym kancernam.
«My ŭzmacniajem sankcyi ŭ dačynieńni da Łukašenki i jaho najbližejšych pamočnikaŭ, uvodziačy abmiežavańni suprać najbujniejšaha kancerna, što znachodzicca pad kantrolem jaho režymu», — zajaviŭ načalnik adździeła kantrolu zamiežnych aktyvaŭ Minfina ZŠA Adam Šubin.
