Ułady Ukrainy majuć namier damahčysia zakryćcia pavietranaj prastory bolšaści krain śvietu dla rasijskich avijakampanij. Dla hetaha jany płanujuć vyklučyć Rasiju ź liku ŭdzielnikaŭ Mižnarodnaj arhanizacyi hramadzianskaj avijacyi (IKAO), paviedamlaje ahienctva «RBK-Ukraina».
«Buduć rasijskija kampanii lotać pa terytoryi Rasii — z Maskvy ŭ Mahadan», — zajaviŭ siońnia na bryfinhu ministr justycyi Ukrainy Pavieł Piatrenka.
Pavodle jaho słoŭ, ukrainskija ŭłady fiksujuć parušeńni rasijskimi samalotami pavietranaj prastory nad Krymam (paŭvostraŭ u Kijevie pa-raniejšamu ličać častkaj Ukrainy) i za kožnaje takoje parušeńnie vystaŭlajuć štraf. Ahulnaja suma štrafaŭ užo pieravysiła 200 młn hryŭniaŭ (kala $17 młn).
«My padali adpaviednuju skarhu ŭ IKAO. Skarha praduhledžvaje, što rasijski bok abaviazany kampiensavać straty. IKAO kanstatuje fakt niezakonnaści pierasiačeńnia našaj pavietranaj prastory i abaviaža Rasiju kampiensavać straty. Jany, jak ja razumieju, buduć ŭchilacca ad hetaha abaviazacielstva, i tady nastupnym etapam my padadzim zajavu ab vyklučeńni Rasii ź IKAO», — skazaŭ Piatrenka.
Pa słovach ministra, nastupstvam vyklučeńnia dla RF moža stać zabarona rasiejskim kampanijam lotać pa terytoryi krain-udzielnic IKAO. U ciapierašni čas u IKAO ŭvachodzić 191 z 193 isnujučych, aficyjna pryznanych dziaržaŭ-členaŭ AAN (za vyklučeńniem Daminiki i Lichtenštejna).
U adpaviednaści sa statutam IKAO sprečki pamiž krainami-ŭdzielnikami mohuć być vyrašanyja rašeńniem Rady IKAO (u jaje ŭvachodziać pradstaŭniki 36 dziaržaŭ) i abskardžanyja ŭ Pastajannaj pałacie mižnarodnaha pravasudździa (PPMP) abo ŭ śpiecyjalna stvoranym traciejskim sudzie. Rašeńni PPMP i traciejskaha suda źjaŭlajucca kančatkovymi i abaviazkovymi da vykanańnia.
U adpaviednaści z art. 87 statuta kožnaja dziaržava-udzielnik IKAO abaviazvajecca «nie dazvalać dziejnaść avijapradpryjemstva jakoj-niebudź dahavornaj dziaržavy ŭ pavietranaj prastory nad svajoj terytoryjaj», kali hetaja kampanija nie vykonvaje kančatkovaha rašeńnia, vyniesienaha ŭ ramkach ŭrehulavańnia sprečki.
