Vielmi kryŭduju ja na Staroho Ułasa. Sprava ŭ tym, što Uładzisłaŭ Sivy-Sivicki, viadomy taksama jak biełaruski piśmiennik pad psieŭdanimam Stary Ułas, značnuju častku žyccia prasłužyŭ spačatku zvyčajnym kucharam, pazniej kuchmistram, a pasla navat i ekanomam u hrafaŭ Tyškievičaŭ, u ich vałožynskich maiontkach. Nam jon pakinuŭ zbornik vieršaŭ «Hod biełarusa» pra ciažkuju dolu mužyckuju. Pazniej takich vieršaŭ napišuć jašče nie adnu tysiaču tamoŭ (ažno i ŭ makułaturu ich ciapier nie biaruć), a za Sivym-Sivickim heta była jašče navina. A voś pra hrafskuju kuchniu Stary Ułas ani słoŭca nie pramoviŭ, i što tam jeli-pili ŭ Vałožynie abo ŭ Viałym, abo chto i jak vynajšaŭ słavutyja kałduny tyškievičaŭskija — my, być moža, nikoli ŭžo nie daviedaiemsia. Voś ža škada, što nastolki nie lubiŭ Stary Ułas svaju prafiesiju, što niiakaj zhadki pra jaje nam nie pakinuŭ.
I dahetul pra kuchniu Tyškievičaŭ my viedaiem značna mienš, čym pra kuchniu Sapiehaŭ, nie kažučy pra Radziviłaŭ. A hety hrafski rod byŭ nie z apošnich u byłym Vialikim Kniastvie Litoŭskim, a pazniej i ŭ Rasijskaj impieryi. I nie tolki bahacciem i dziaržaŭnymi pasadami, jakija ŭ rešcie rešt rastaiuć, jak dym, ale i svaimi navukovymi, kulturnymi, a navat i spartyŭnymi dasiahnienniami słaviŭsia. Kanstancin i Jaŭstafij Tyškievičy ŭ siaredzinie XIX stahoddzia zasnavali słavutyja pryvatnyja muziei staražytnaściaŭ u Łahojsku i ŭ Vilni, kalekcyi jakich dali pačatak sučasnamu Nacyianalnamu muzieju Litvy, a sami braty ličacca zasnavalnikami navukovaj archieałohii, krajaznaŭstva i muziejnaj spravy ŭ Litvie. Bieniedykt Hienryk Tyškievič z Vałožynskaj haliny byŭ adnym ź piianieraŭ fatahrafii ŭ Biełarusi i Litvie, adnym ź pieršych aŭtamabilistaŭ i tenisistaŭ, da taho ž jachtśmienam, vandroŭnikam. Darečy, heta jaho, a taksama jaho syna, inšaha Bieniedykta, słužboŭcami byli Stary Ułas, baćka piśmiennika Jadvihina Š. Jan Lavicki i baćka Kanstancyi Bujło Anton. Voś vam i ceły asiarodak biełaruščyny pry adnym tyškievičaŭskim dvary. Michał Tyškievič, taksama z vałožynskaj haliny, — zaŭziaty palaŭničy i archieołah, u druhoj pałovie XIX stahoddzia ŭładalnik, mahčyma, najbolšaj pryvatnaj kalekcyi staražytnaściaŭ u śviecie (pieradusim rymskich i jehipieckich), ekspanaty jakoj pasla jaho śmierci apynulisia ŭ muzieiach Paryža, Łondana, Ryma, Kapienhahiena, Bostana. Alfred Tyškievič — zasnavalnik słavutaha litoŭskaha kurorta Pałanha. A voś aktrysu Bieatu Tyškievič dobra pamiataje i cenić starejšaje pakalennie amataraŭ kino nie tolki ŭ Polščy, ale i ŭsioj prastory kolišniaha SSSR. Tamu vielmi kryŭdna, što navat tyja niešmatlikija źviestki pra byłuju kuchniu Tyškievičaŭ, jakija da nas dajšli, zusim biessistemnyja.
Naprykład, adna z samych vialikich zahadak biełaruskaj historyi: jakomu z hrafaŭ Tyškievičaŭ naležyć honar vynachodnictva słavutych kałdunoŭ? Archieołahu Jaŭstachu abo Michału, pałkoŭniku 17-ha pałka napaleonaŭskich ułanaŭ? Abo, moža, jašče kamuści sa słavutaha rodu? Recept hetaj stravy padadzieny ŭžo ŭ pieršym vydanni «Kucharki litoŭskaj» (1854) z paznakaj «kałduny hrafa Tyškieviča», pryčym, vidać, mnohija ź pieršych čytačoŭ viedali, na kuchni jakoha kankretna hrafa ich hatuiuć, z ułasnaha pryiemnaha dośviedu. Tady aŭtarcy zdavałasia, što heta i tak usie viedaiuć. A voś prajšło 160 hadoŭ — i toje, što było vidavočnym, zabyłasia. Moža, zachoŭvaiucca hetyja viedy ŭ siamiejnych pa-
danniach rodu? Ale ni aktrysa Bieata Tyškievič, ni jaje brat Kšyštaf, jaki žyvie ŭ Hamburhu i zajmaiecca, miž inšym, vytvorčasciu kulinarnych dakumientalnych filmaŭ, čamuści na publicy hetymi sakretami nikoli nie dzialilisia. Škada.
Aproč słavutych kałdunoŭ, historyja zachavała dla nas recepty «burakoŭ hrafa Tyškieviča» i «supa hrafa Tyškieviča». Što ž, dziakuj pakul i za heta. Ale ja pierakanany, što simvaličnuju jednaść z pamiacciu hetaha słavutaha rodu my mahli b kultyvavać u tym liku i z dapamohaj znakavych tyškievičaŭskich straŭ. Ci buduć kali-niebudź u Vałožynie abo Łahojsku tyškievičaŭskija restarany? Pakul pra heta možna tolki maryć.
Kałduny hrafa Tyškieviča
(na 4-5 porcyj)
Dla ciesta: 2 šklanki muki, 2 jajki (1 žaŭtok dadatkova), 3-4 st. łyžki soku cybuli, sol.
Sposab pryhatavannia: Prasieiać muku ŭ vialikuju misu (nasypać «horkaj»), zrabić jamku ŭ centry, ulić sok cybuli, ubić jajki i žaŭtok, staranna vymiesić. Vady nie dadavać.
Pakryć ručnikom i pastavić «adpačyć» u prachałodnym miescy na 30 chvilin.
Dla načynki: 150 h sušanych hryboŭ, 2 pakryšanyja cybuli, tłušč dla smažannia, 200 h venždanaj šynki, 2 zvaranyja ŭkrutuju jajki, 1 syroje jajka, sol i pierac na smak.
Sposab pryhatavannia: Pierabrać sušanyja hryby, staranna pramyć i zamačyć u chałodnaj vadzie na 3-4 hadziny. Iznoŭ pramyć i varyć na małym ahni ŭ vadzie, u jakoj zamočvali 1-1,5 hadziny. (Možna ŭžyvać i śviežyja hryby, tady zamočvać i varyć nie treba.) Prypuscić cybulu na patelni, dadać pakryšanyja hryby, smažyć razam 1 chvilinu, achaładzić. Dadać drobna pakryšanyja varanyja jajki, šynku, ubić syroje jajka, dadać sol i pierac na smak.
Raskatać ciesta ŭ kruhły valik dyjamietram kala 5 sm, narezać kružkami 1 sm taŭščynioj, rasplaskać kožny ŭručnuju. Pakłasci nievialikuju hałku načynki na kožny kružok ź ciesta, zharnuć kałduny, staranna zaščypać krai. Varyć u dobra pasolenaj vadzie na małym ahni 5-6 chvilin pasla ŭspłyvannia kałdunoŭ na pavierchniu.