Žurnalist biełaruskaha pachodžańnia, stvaralnik sajt «Biełaruski partyzan» Pavieł Šaramiet spyniŭ svajo supracoŭnictva z Hramadskim telebačańniem Rasii. Voś što napisaŭ Šaramiet u svaim fejsbuku:
«Skončyŭsia moj karotki raman z novym rasijskim hramadskim telebačańniem.
«Iźviestija», jakija kaliści ličylisia surjoznaj i reśpiektabielnaj hazietaj, niadaŭna pryśviacili mnie amal pałovu druhoj pałasy. Hazieta z radykalna-antyŭkrainskaha chołdynhu «Łajfńjus» raspaŭsiudziła danos niejkaha «staršyni vykankama narodnaha frontu paŭdniova-uschodu Ukrainy» Zinčanki. Hety Zinčanka viadomy tym, što najmaŭ bajevikoŭ padčas Majdana dla napadu na hramadskich aktyvistaŭ i źbiraŭ usialaki zbrod na Antymajdan pad ścienami Viarchoŭnaj Rady.
Hety dziejač nibyta napisaŭ listy dyrektaru Hramadskaha telebačańnia Rasii Łysienku i staršyni Sajuza žurnalistaŭ Rasii Bahdanavu z patrabavańniem razabracca z «rusafobam Šaramietam, jaki biare ahidna ŭhodlivyja intervju va ŭkrainskich karnikaŭ».
Apošnim časam u Rasiei idzie sapraŭdnaja chvala ckavańnia tych žurnalistaŭ, jakija raskazvajuć ab ŭkrainskich padziejach i rasijska-ŭkrainskaj vajnie nie ŭ stylistycy kramloŭskaj prapahandy. Bajeviki ž ukrainskich «Hradaŭ» nie bajacca, tym bolš, što pa ich z «Hradaŭ» jašče i nie palili. Jany praŭdy bajacca bolš usialakich «hradaŭ». Jany vajnu z braterskim narodam pabudavali na chłuśni i falšyvych navinach.
Pakidaju rasijskaje Hramadskaje telebačańnie z čystym sumleńniem. Ja, ščyra kažučy, byŭ mocna ździŭleny, kali mianie zaprasili tudy vieści prahramu «Praŭda!» Dziŭna, što nam udałosia tak doŭha - 9 miesiacaŭ - pratrymacca ŭ mory rasijskaj teleprapahandy i ciemrašalstva.
9 miesiacaŭ rabili z kalehami štodzionnuju prahramu. Zasłužyli «Załatoje piaro» Sajuza žurnalistaŭ za hety teleprajekt. Pra Majdan my zrabili prahram piać i ŭsie jany kardynalna adroźnivalisia ad praduktaŭ na inšych fiederalnych kanałach. Chto ž takoje daruje - usio vakoł u łajnie, a ty adzin možaš być u biełym?! Ale ja nie škaduju».
