 Alaksandar Kazulin |
Siońnia paśla doŭhaterminovaha spatkańnia z Alaksandram Kazulinym dadomu viarnucca jahonyja žonka i dočki. Bolej za miesiac nie było dakładnych źviestak pra zdaroŭje palityka, jakoha užo paŭtara hady trymajuć u viciebskaj kalonii.
Siamja Alaksandra Kazulina pryjechała da jaho na doŭhaterminovaje spatkańnie ŭ minułuju subotu, 24 listapada. Kali napiaredadni ja razmaŭlaŭ z žonkaj palityka Irynaj, jana nie chavała chvalavańnia i zhadvała, što apošni raz była na doŭhaterminovym spatkańni z mužam u studzieni.
«Razam sabracca i pahavaryć — heta było tak daŭno, što ja ŭžo i zabyłasia, jak heta byvaje. Tamu vielmi čakaju hetaj sustrečy i spadziajusia, što jana projdzie ŭ nas vielmi dobra».
Hod tamu Alaksandr Kazulin 53 dni trymaŭ haładoŭku, jakaja zakončyłasia tym, što ŭ Saviecie Biaśpieki AAN była ŭźniataja prablema pravoŭ čałavieka ŭ Biełarusi. Paśla palityk doŭha chvareŭ i dahetul trymajecca dyjetyčnaha charčavańnia. Žurnalisty vielmi spadziajucca na infarmacyju pra zdaroŭje ad Alaksandra Kazulina ad jahonych svajakoŭ. Što da administracyja kalonii, tam znoŭ kažuć — z Kazulinym nibyta ŭsio dobra. Hrupa pravaabaroncaŭ, u tym liku Aleh Voŭčak, u niadzielu sustrakalisia z namieśnikam načalnika kalonii Rusłanam Prymakom. Voś što jany pačuli ad milicyjanta.
«My jaho spytali, jak Kazulin pačuvajecca? Adkazaŭ, što badziora, nastroj u jaho dobry. My zapytalisia, kali jaho adpuściać na volu. Milicyjant vykazaŭsia pra toje, što heta budzie bačna paśla amnistyi».
Miž tym pavodle raniejšych źviestak Alaksandr Kazulin pad amnistyju nie padpadaje i nia maje šancaŭ na vychad na volu ŭžo sioleta ci ŭ pačatku nastupnaha hodu. Pra heta kazali ŭ Ministerstvie ŭnutranych spraŭ. «Moža ŭ milicyjantaŭ z kalonii inšyja źviestki?»,— zacikaviŭsia pravaabaronca Aleh Voŭčak i zhadaŭ pra niadaŭniuju zajavu ministra ŭnutranych spraŭ Uładzimiera Navumava pra nieabchodnaść jašče adnoj amnistyi.
Nahadaju, 25‑ha listapada Alaksandr Kazulin adśviatkavaŭ narodziny. Palityku spoŭniłasia 52 hady. Sustrecca ź im pravaabaroncam nie dazvolili. Aleh Voŭčak skazaŭ, što naviedvalnikaŭ navat nie puścili ŭ budynak administracyi i tady jany pobač z ŭvachodam niekalki razoŭ hučna prakryčali «Vinšujem!» i «Svabodu Kazulinu!»
«Siońnia zapytajusia ŭ dačok Kazulina, ci było nas čuvać ŭ pakoi, dzie prachodziać spatkańni»,— skazaŭ Aleh Voŭčak.
