Siońnia prajšoŭ matč u adkaz treciaha kvalifikacyjnaha raŭnda Lihi Jeŭropy pamiž biełaruskim «Šachcioram» i «Ziułte-Varehiemam» ź Bielhii. Matč tydniovaj daŭniny nie pakidaŭ spadzievaŭ na zakručany siužet i bahaćcie emocyj, jak było dva dni tamu padčas sustrečy BATE i «Debrecena».
Sprava ŭ tym, što «Šachcior» pieramoh ź likam 5:2. Heta značyć, što supierniku treba było zabivać minimum čatyry hały, pry hetym prapuskać im nielha było nivodnaha.
Matč prachodziŭ u Barysavie. Bo salihorskaja arena nie adpaviadaje patrabavańniam UEFA, u Minsku dobraha stadyjona niama, a da Homiela jechać daloka. Z Salihorska, Babrujska (fanaty kamand siabrujuć) i Barysava sabrałasia davoli prystojnaja aŭdytoryja. Kali aceńvać na voka, to było tysiačy 3-4. Asabliva dobraja padtrymka išła z fan-siektara.
A kali Siarhiej Bałanovič adkryŭ lik u hulni, to na pole vybieh adzin z fanataŭ. Praŭda, šmat prajści pa hazonie ŭ jaho nie atrymałasia. Ściuardy chutka skrucili pacanu ruki dy paviali, mabyć, u najbližejšy aparniak. A kala siektara ščylnieńka stali chłopcy ŭ aranžavych kamizelkach, kab bolej takich incydentaŭ nie było.
Zadača «Ziułte-Varehiema» jašče bolš uskładniłasia. Zdajecca, abiedźvie hulali na lohkim rassłabonie. Adnych («Šachcior») heta zadavalniała, a bielhijcy chutčej sprabavali paźbiehnuć traŭmaŭ dy najhrać źviazki dla matčaŭ čempijanatu.
U vyniku hulnia skončyłasia ź likam 2:2 (Bałanovič, 7, 42 – Siła 41, 74). Niervavacca za biełarusaŭ nie daviałosia. Zaŭtra «Šachcior» daviedajecca svajho supiernika pa płej-of Lihi Jeŭropy. Heta najlepšaje dasiahnieńnie salihorcaŭ na mižnarodnaj arenie.
