Fota BiełTA.
Sustrečy z udziełam prezidentaŭ mytnaj «trojki» i, mahčyma, Ukrainy płanujucca ŭ bližejšy čas, paviedamiŭ Alaksandr Łukašenka, prymajučy siońnia lideraŭ kampartyj Rasii i Ukrainy Hienadzia Ziuhanava i Piatra Simanienka.
Ziuhanaŭ i Simanienka prybyli ŭ Minsk dla abmierkavańnia situacyi va Ukrainie i sumiesnych dziejańniach dla praduchileńnia zabarony kampartyi Ukrainy.
Pieramovy pačalisia ranicaj u minskim hateli «Jeŭropa» z udziełam pieršaha sakratara CK Kamunistyčnaj partyi Biełarusi Ihara Karpienki.
«U bližejšy čas my płanujem — prezidenty Biełarusi, Rasii, Kazachstana, Ukrainy (kali Ukraina na heta pojdzie) — pravieści šerah sustreč dla taho, kab pryncypova abmierkavać, što ž adbyvajecca tut u nas», — cytuje Łukašenku dziaržaŭnaje ahienctva BiełTA.
«Chto b kali-niebudź moh padumać, što siarod troch dziaržaŭ, słavianskich, samych blizkich i rodnych narodaŭ moža ŭźniknuć takaja kaša na poŭdni našaj, nie pabajusia hetaha słova, ajčyny», — skazaŭ Łukašenka.
«Zrazumieła imknieńnie amierykancaŭ, jeŭrapiejcaŭ. Ja jašče ŭ samym pačatku skazaŭ, što nam treba apasacca, nas buduć uciahvać u hetu bojniu, jak u varonku, kab stvaryć tut nie prosta ačah napružanaści, a toje, što adbyvajecca ciapier, — sparadzić novuju vajnu. I heta budzie vajna vielmi niebiaśpiečnaja. Na heta ŭvahu tady nichto nie źviarnuŭ. I pahladzicie, što adbyvajecca», — padkreśliŭ jon.
Źviartajučysia da Ziuhanavu i Simanienki, Łukašenka adznačyŭ, što dla jaho vielmi važna pačuć alternatyŭny punkt hledžańnia jak z Maskvy, tak i z Kijeva z nahody raźvićcia situacyi.
Tym časam pres-słužba prezidenta Kazachstana paviedamlaje, što
«Rasija i Kazachstan razhladajuć mahčymaść pryniaćcia sumiesnych krokaŭ pa praviadzieńni pramych pieramovaŭ z prezidentam Ukrainy Piatrom Parašenkam».
Hetaje pytańnie Uładzimir Pucin i Nursułtan Nazarbajeŭ abmiarkoŭvali padčas telefonnaj razmovy.
«Kiraŭniki dźviuch dziaržaŭ abmianialisia dumkami ab kryzisnaj situacyi va Ukrainie, a taksama ab mahčymym pryniaćci sumiesnych krokaŭ pa praviadzieńni pramych pieramovaŭ z prezidentam Ukrainy ŭ roznych farmatach, u tym liku ŭ ramkach sustrečy z členami Mytnaha sajuza i Ukrainy ci pazačarhovaha pasiadžeńnia Savieta kiraŭnikoŭ dziaržaŭ SND», — skazana ŭ paviedamleńni pres-słužby.
