Siońnia Alaksandr Łukašenka zrabiŭ šerah kadravych pryznačeńniaŭ. U asnoŭnym jany tyčylisia kiraŭnikoŭ viertykali ŭłady ŭ rajonnych i abłasnych centrach.
Dvuch novych namieśnikaŭ staršyni abłvykankamu atrymali ŭ Homieli. Sprava ŭ tym, što ich papiaredniki trapilisia na chabary, a ciapier čakajuć suda ŭ izalatary. Novymi namieśnikami stali staršynia Administracyi Čyhunačnaha rajona Homiela Aleh Pačynok i namieśnik ministra sportu i turyzmu Uładzimir Pryvałaŭ (jon raniej pracavaŭ u Homielskim harvykankamie načalnikam adździeła pa spravach moładzi).
Źviartaje ŭvahu, što dva niadaŭna pryznačanyja staršyni abłasnych KDB Siarhiej Cierabaŭ i Alaksandr Cierachaŭ pryznačanyja členami Homielskaha i Hrodzienskaha abłvykankamaŭ adpaviedna. Cikava, što na sajcie BIEŁTA nie źjavilisia ich fatahrafii.
Narešcie atrymaŭ kiraŭnika horada Hrodna. Sprava ŭ tym, što ŭ pačatku hoda papiaredniahia staršyniu harvykankama Andreja Chudyka zabrali ŭ Minsk namieśnikam u Kiraŭnictva spravaŭ prezidenta.
Novym «meram» Hrodna staŭ Miečysłaŭ Branisłavavič Hoj, jaki da hetaha amal dziesiać hadoŭ kiravaŭ Smarhonskim rajvykankamam.
Miečysłavu Hoju 51 hod. Jon rodam ź vioski Šłoviency Voranaŭskaha rajona (znachodzicca na miažy ź Litvoj). Dla biełaruskaha čynoŭnika jon nadzvyčaj dobra pradstaŭleny ŭ sacyjalnych sietkach. Naprykład, maje svaju staronku Ukantakcie. Praŭda, u jaho tam tolki 12 siabroŭ i 4 padpisčyki, ale staronka nie zakinutaja. Čas ad času pradstaŭnik viertykali jaje naviedvaje. Voś skryn-šot jahonaj staronki.
Jon skončyŭ BDATU, ahramiechaničny fakultet (1989), a taksama Akademiju kiravańnia pry prezidencie (2004). U ankiecie Ukantakcie paznačana kanfiesija «katalicyzm». Padpisany sp.Hoj usiaho na dźvie supołki Smorhoń.org i Novosti Vitiebska i obłasti TUT.
Taksama jon maje staronku ŭ sacyjalnaj sietcy pošty mail.ru «Moj mir». Žanaty, maje troch synoŭ.
Smarhonski rajon — adzin ź pieradavych u Hrodzienskaj vobłaści. Na jaho terytoryi znachodziacca mocnyja SPK «Soły» i «Žodziški». A taksama 18 pramysłovych pradpryjemstvaŭ. U 2009 u Smarhoni prachodziŭ Dzień biełaruskaj piśmiennaści.
Hoj napisaŭ ustupnaje słova da knihi «Smarhonščyna litaraturnaja», dzie ŭ tym liku dobra adhuknuŭsia pra takich uradžencaŭ kraju jak paet Francišak Bahuševič, kampazitar Michał Kleafas Ahinski, movaznaŭca Janka Stankievič, ksiondz Adam Stankievič.
