Kamitet dziaržkantrolu Homielskaj vobłaści pravieryŭ jakaść arhanizacyi i charčavańnia dziaciej u letnich azdaraŭlenčych łahierach. Pravierka pakazała, što kuchary łahiera «Čonkaŭski bor» za dva dni zdoleli «sekanomić» na charčavańni dziaciej praduktaŭ na 4 młn. rubloŭ.
Jak paviedamlaje pres-słužba KDK Homielskaj vobłaści, u pole zroku inśpiektaraŭ pavodle vynikaŭ haračaj linii trapili dva azdaraŭlenčyja łahiery — «Čonkaŭski bor» i «Juny chimik». Treci abjekt byŭ abrany dla pravierki jak samy bujny ŭ vobłaści — azdaraŭlenčy łahier imia Marata Kazieja.
U vyniku pravierak ustanoŭlena, što va ŭsich troch azdaraŭlenčych łahierach parušalisia sanitarnyja normy i praviły, a ŭ dvuch dzieciam adpuskalisia stravy niapoŭnaj vahoj i mieli miesca fakty niedakładvańnia syraviny pry hatavańni straŭ.
Pry hetym asabliva vyznačyŭsia «Čonkaŭski bor».
Tak, u pieršy dzień pravierki ŭ pakoi sutačnaha zapasu praduktaŭ stałovaj łahiera, dzie paśla hatavańnia śniedańnia i abiedu pavinny byli zastacca tolki pradukty, pryznačanyja dzieciam na połudzień i viačeru, śpiecyjalisty KDK ustanavili liški tavaraŭ bolš jak na 500 tys. rubloŭ. U hety ž dzień hetyja tavary byli apisanyja i aprychodavanyja na skład. Adnak heta rabotnikaŭ stałovaj nie spyniła, i na nastupny dzień jany «sekanomili» praduktaŭ u siem razoŭ bolš — na 3,5 młn. rubloŭ (20 kh miasa śvininy, 4 kh ryby, 14 kh pamidoraŭ i ahurkoŭ, 35 pačkaŭ masła, 30 pakietaŭ małaka i h. d.). Pradukty ŭžo byli rasfasavanyja pa asobnych karobkach u vyhladzie charčovych naboraŭ.
Ustanoŭlenyja liški tavaraŭ pieradadzienyja na skład, a dziejańniam rabotnikaŭ stałovaj pravaachoŭnyja orhany dajuć pravavuju acenku.
Pavodle vynikaŭ łabaratornych daśledavańniaŭ, nivodnaja sa straŭ, pryhatavanych dzieciam na abied, nie adpaviadała normam zakładki praduktaŭ. Akramia niedaŭkładańnia praduktaŭ dzieciam adpuskalisia i porcyi niapoŭnaj vahoj, mienšyja pa masie na 15—18%.
