Pajšła z žyćcia nastaŭnica matematyki Maładziečanskaj SŠ №1 Iryna Łachmakova. Irynie Fiodaraŭnie było 45 hadoŭ. Jana pamierła 7 žniŭnia paśla šmathadovaj chvaroby.
Jak raspavioŭ partału Kraj.baj dyrektar SŠ №1 imia Janki Kupały Piotr Chrol, Iryna Łachmakova adpracavała ŭ škole kala 20 hadoŭ. Mieła vyšejšuju kvalifikacyjnuju katehoryju. Vykładała matematyku, była kłasnym kiraŭnikom. Apošnija dva hady pracavała namieśnikam dyrektara pa vučebna-mietadyčnaj rabocie.
Bolš za 10 hadoŭ Iryna Łachmakova chvareła. Jaje pachavali 9 žniŭnia. U Iryny Fiodaraŭny zastałasia 17-hadovaja dačka, jakaja sioleta skončyła škołu.
Pa słovach dyrektara škoły, Iryna Łachmakova była prafiesijanałam najvyšejšaha kłasa.
«Jaje ŭsie viedali jak vydatnaha matematyka. Iryna Fiodaraŭna była i kłasnym kiraŭnikom — z baćkami vučniaŭ jana ŭmieła naładžvać dobryja stasunki.
Pa natury heta byŭ bajec. Ujavicie, 13 hadoŭ čałaviek chvareŭ, ale imknuŭsia žyć. Jana praktyčna ŭvieś čas hareła i vajavała za žyćcio», — skazaŭ Piotr Chrol.
U hrupie SŠ №1 Ukantakcie pad paviedamleńniem pra śmierć Iryny Łachmakovaj vučni i vypuskniki škoły napisali:
«Dobry čałaviek i nastaŭnik. Škada, što ŭ svoj čas jana vykładała ŭ mianie tolki adzin hod».
«Samy lepšy nastaŭnik matematyki!!!»
«Samaja lepšaja».
